Мирослав Клозе -беҳтарин нишонзани чемпионатҳои ҷаҳон ҳунарнамоиашро дар майдони футбол ба охир расонд

Душанбе, 02.11.2016 /АМИТ «Ховар»/. Собиқ бозингари дастаи мунтахаби Олмон Мирослав Клозе ҳунарнамоиашро дар майдони футбол ба охир расонид. Дар ин бора рӯзи гузашта сомонаи Иттиҳоди футболи Олмон баёнияеро аз номи ин бозингари шӯҳратёр ба нашр расонидааст.

«Ман дар ҳайати дастаи мунтахаб ба комёбиҳои назаррас соҳиб шудам ва ба қароре омадам, ки фаъолиятамро ба ҳайси мураббӣ давом диҳам. Ҳоло аз ҷиҳати назариявӣ омода мешавам, то онро дар амал ҷорӣ намоям»- гуфтааст бозингари 38-сола.

Клуби футболе, ки Клозе солҳои охир дар он бозӣ кардааст, «Латсио»-и Италия мебошад. Пештар ӯ шарафи клубҳои футболи «Кайзерслаутерн», «Вердер» ва «Бавария»-ро ҳимоя карда, дар ҳайати он ду маротиба чемпиони Олмон гардида, ду маротибаи дигар Ҷоми ин кишварро ба даст овардааст.

Мирослав дар ҳайати дастаи мунтахаби Олмон аз соли 2001 то 2014 дар мусобиқаҳо ширкат варзида,  Чемпиони ҷаҳон (Бразилия-2014), соҳиби медалҳои нуқра (Корея/Ҷопон-2002,  ) ва  ду маротиба соҳиби ҷоизаи сеюм (Олмон-2006 ва Африқои ҷанубӣ-2010) гардидааст.

Ба ғайр аз ин,   ӯ барандаи медалҳои нуқраи Чемпионати Аврупо (2008) ва биринҷии соли 2012 мебошад.

Клозе бо 16 тӯб дар таърихи мусобиқоти Ҷоми ҷаҳон  нишонзани беҳтарин ба ҳисоб меравад.