«Нақши мероси маънавии ниёгон дар гуфтугӯи фарҳангҳо»- Конфронси илмию амалии ҷумҳуриявӣ дар Маркази исломшиносӣ

Душанбе, 03.11.2016 /АМИТ «Ховар»/. Маркази исломшиносӣ дар назди Президенти Ҷумҳурии Тоҷикистон тасмим гирифтааст, ки 9 ноябри соли равон Конфронси илмию амалии ҷумҳуриявиро дар мавзӯи «Нақши мероси маънавии ниёгон дар гуфтугӯи фарҳангҳо» доир намояд.
Тавре аз Маркази исломшиносӣ ба АМИТ «Ховар» хабар доданд, дар конфронс мавзӯъҳои «Вазъи кунунӣ ва мушкилоти пажӯҳиши мероси ниёгон», «Пайванди мероси маънавӣ бо фарҳанги муосири миллӣ дар таҷрибаи давлатдории навини тоҷикон», «Нақши робитаҳои адабӣ дар гуфтугӯи фарҳангҳо», «Таносуби арзишҳои миллӣ ва динӣ дар мероси фарҳангии ниёгон», «Нақши мероси ахлоқӣ дар ташаккули тафаккури созанда», «Эҳёи хотираи таърихӣ ҳамчун омили ташаккули худшиносии миллӣ», «Таҳаммулпазирӣ- арзиши меҳварии мероси маънавии ниёгон» ва «Фарҳанги миллӣ ва бунёди ҷомеаи шаҳрвандӣ» баррасӣ мешаванд.