Рӯзҳои наздик дар Тоҷикистон барф ва яхбандӣ дар назар аст

Душанбе, 15.11.16. /АМИТ «Ховар»/. Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон шаҳрвандон ва меҳмонони кишварро огоҳ мекунад, ки аз 19 то 26-уми ноябри соли равон дар қаламрави мамлакат якбора паст шудани ҳарорати ҳаво ва боронҳои ба барф табдилёбанда дар назар аст. Дар минтақаҳои кӯҳӣ эҳтимоли боридани барфи тар ва яхбандӣ вуҷуд дорад.
Аз ин рӯ хатари гусастани хати алоқа ва интиқоли неруи барқ, расидани зарар ба аҳолӣ, ҳамчунин афзоиш ёфтани шумораи садамаҳои нақлиётӣ ба миён меояд.
Кумитаи ҳолатҳои фавқулода ва мудофиаи гражданӣ ба шаҳрвандон тавсия медиҳад, ки дар чунин рӯзҳо ҳаракати бе зарурати худро аз як ҷой ба макони дигар аз тариқи роҳҳои кӯҳӣ маҳдуд созанд. Аз кӯчаву гузаргоҳҳо бо эҳтиёт ҳаракат кунанд, ба хати интиқоли неруи барқ бештар диққат диҳанд.
Агар шумо дар ҷодае ё минтақае симҳои кандашудаи барқро мушоҳида кардед, хеле зуд ба маъмурияти нуқтаи аҳолинишин дар ин бора хабар диҳед.