Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин аз тарафи вакилони Маҷлиси намояндагон тасдиқ карда шуд

Ноябрь 16, 2016 15:26

Душанбе, 16.11.2016 /АМИТ «Ховар»/. Вакилони Маҷлиси намояндагони Маҷлиси Олии Ҷумҳурии Тоҷикистон дар ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон даъвати панҷум, ки имрӯз таҳти раёсати Раиси Маҷлиси намояндагон Шукурҷон Зуҳуров баргузор гардид, Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба сохтмони дидбонгоҳҳои сарҳадӣ дар ҳудуди Ҷумҳурии Тоҷикистонро ба тасвиб расониданд.
Аз рӯи масъалаи мазкур дар назди вакилони мардумӣ муовини якуми раиси Кумитаи давлатии амнияти миллии Ҷумҳурии Тоҷикистон Мансурҷон Умаров ва вакили Маҷлиси намояндагон Қобилҷон Аҳмадов сухан гуфтанд.
Зикр гардид, ки Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба сохтмони дидбонгоҳҳои сарҳадӣ дар ҳудуди Ҷумҳурии Тоҷикистон аз тарафи Президенти Ҷумҳурии Тоҷикистон барои тасдиқ ба Маҷлиси намояндагони Маҷлиси Олии Ҷумҳурии Тоҷикистон пешниҳод гардидааст.
«Дар доираи Созишномаи мазкур дар хатти сарҳади давлатии Тоҷикистону Афғонистон сохтмони се комендатура, чор дидбонгоҳи сарҳадӣ, чор пости сарҳадӣ ва як маркази таълимӣ, сохтмони биноҳои маъмурӣ-хизматӣ, хобгоҳҳо, майдончаҳои тамринӣ, анборҳо ва дигар иншооти ёрирасон, инчунин муҷаҳҳазгардонӣ бо мебелу асбобу лавозимот пешбинӣ гардидааст», — зикр кард Мансурҷон Умаров.
Таъкид гардид, ки Созишнома бо назардошти пешгирӣ намудан аз таҳдидҳо ва хатарҳои мунтазами созмонҳои террористии байналмилалӣ ба амнияти Тоҷикистон баста шудааст. Қобилҷон Аҳмадов, вакили Маҷлиси намояндагон изҳор кард, ки «Созишнома байни Тоҷикистон ва Чин оид ба сохтмони дидбонгоҳҳои сарҳадӣ ба Конститутсия ва дигар сандаҳои меъёрӣ-ҳуқуқии Тоҷикистон мухолифат надорад».
Ҳамин тавр, вакилони мардумӣ дар ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон даъвати панҷум ба Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба сохтмони дидбонгоҳҳои сарҳадӣ дар ҳудуди Ҷумҳурии Тоҷикистон овоз доданд.

Ноябрь 16, 2016 15:26

Хабарҳои дигари ин бахш

Дар Мастчоҳ вохӯрии вакили Маҷлиси намояндагон бо интихобкунандагон доир шуд
Мутахассисони алоқа «таҳаввулоти рақамӣ» пешбинӣ менамоянд
Олимони тоҷик аз қитъаҳои заминҳои таҷрибавӣ дар Яғноб ҳосили хуб гирифтанд
Имрӯз дар ноҳияҳои кӯҳии Тоҷикистон ҳаво то 30 дараҷа гарм мешавад
Дар шаҳри Бӯстон бахшида ба соли нави таҳсил ҳамоиш доир шуд
Дар ноҳияи Рӯдакӣ сохтмони муассисаи томактабии «Ёсуман» ба анҷом расид
Бахшида ба Рӯзи дониш дар Донишкадаи кӯҳию металлургии Тоҷикистон ҳамоиш баргузор шуд
МАЪРИФАТ — ПОЙДОР, ИЛМУ АДАБ — УСТУВОР. Дар ноҳияи Ёвон Рӯзи дониш ва Дарси сулҳ таҷлил гардид
Имрӯз дар шаҳри Душанбе ҳаво то 35 дараҷа гарм мешавад
«Ҷойгоҳи зан дар даврони Истиқлол»-таҳти чунин унвон дар Левакант конфронси ҷумҳуриявӣ доир гардид
Имрӯз дар ноҳияҳои кӯҳии Тоҷикистон ҳаво то 33 дараҷа гарм мешавад
Ҳунарҳои мардумӣ бо усули «хона ба хона» ва «маҳалла ба маҳалла» тарғиб карда шуданд