Дар Душанбе давраи бозомӯзӣ барои варзишгарону мураббиён аз намуди шиноварӣ оғоз шуд

Душанбе, 02.12.2016. /АМИТ«Ховар»/. Дар шаҳри Душанбе давраи бозомӯзӣ барои варзишгарону мураббиён аз намуди шиноварӣ тибқи барномаи Ҳамбастагии олимпӣ шурӯъ шуд, ки то рӯзи 7 декабр идома мекунад. Дар ин бора ба АМИТ «Ховар» аз Кумитаи миллии олимпии Тоҷикистон хабар доданд.
«Давраи бозомӯзӣ барои варзишгарону мураббиён аз намуди шиновариро Кумитаи миллии олимпӣ дар ҳамкорӣ бо Федератсияи шиноварии Тоҷикистон баргузор кардааст. Дар машғулиятҳо варзишгарону мураббиёни ин соҳаи олимпии варзиш аз манотиқи мухталифи кишвар ширкат доранд. Ба машғулиятҳои назариявию амалӣ коршиноси байналмилалӣ Геннадий Климчук аз Украина раҳбарӣ мекунад»,-иттилоъ медиҳад манбаъ.
Ба иттилои корманди масъули Кумитаи миллии олимпии Тоҷикистон Вазирбек Назиров, «ҳадафи давраи бозомӯзӣ баланд бардоштани дараҷаи тахассусии мураббиёни тоҷик мебошад».
«Машғулиятҳои назариявӣ дар маҷлисгоҳи Кумитаи миллии олимпии ҶТ ва машғулиятҳои амалӣ дар ҳавзи шиноварии маҷмааи варзишии Вазорати корҳои дохилии Ҷумҳурии Тоҷикистон баргузор мешаванд»,-хабар дод манбаъ.