ФИФА истифодаи видеодоварро ба роҳ монд

ДУШАНБЕ, 9.12.2016 /АМИТ «Ховар»/. Шурӯъ аз дирӯз Федератсияи байналмилалии футбол (ФИФА) бори аввал дар таърих истифодаи видеодоварро дар бозии футбол ба роҳ монд. Дар ин бора сомонаи «www.sport-express.ru» хабар медиҳад.
Манбаъ овардааст, ки дар мусобиқаи чемпионати ҷаҳон оид ба футбол байни клубҳо, ки дирӯз дар Япония шурӯъ гардид, ин ниҳоди футболи ҷаҳон истифодаи таҷрибавии видеодоварро ба роҳ монд ва иҷозат дода шуд, ки доварон вохӯриро ҳангоми зарурат боздошт намуда, бо истифода аз монитори дар майдон гузошташуда хулоса бароранд. Аз тарафи дигар довар метавонад бозиро манъ накарда, маълумоти муфассалро аз ёвари худ, ки дар хонаи бо техника муҷаҳҳаз қарор дорад, тавассути алоқаи садоӣ, ки дар гӯшҳояш гузошта шудаанд, қазоват кунад.
«Дар ихтиёри ёвари довар 23 камера вогузор шудааст», — овардааст «www.sport-express.ru».
Шӯрои байналмилалӣ (ИФАБ), ки ба қоидаҳои футбол тағйирот ворид мекунад, лаҳзаҳои истифода аз видеодоварро муқаррар кардааст. Ба ҳамин тартиб, доварон дар он ҳолате метавонанд ба сабтҳои видеоӣ муроҷиат кунанд, ки агар ба дуруст зада шудани гол, аз майдон ронда шудани бозингар (корти сурх) ва таъйини ҷаримаи 11-метраи пеналтӣ шубҳа дошта бошанд.
Тавре Шӯрои байналмилалӣ хабар медиҳад, дар бозии аввал байни дастаҳои «Касима Антлерс» ва «Окленд Сити» (2:1) зарурати истифодаи видеодовар пайдо нашудааст ва доварон аз иҷрои вазифаашон бо сари баланд баромадаанд.