«Гуанджоу Эвергаранд» барои Арда Туран 50 000 000 евро нарх гузоштааст

ДУШАНБЕ, 27.12.2016 /АМИТ «Ховар»/. Клуби футболи «Гуанджоу Эвергаранд» барои харидории бозингари дастаи «Барселона» Арда Туран 50 миллион евро (52 миллион доллар) пешниҳод кардааст. Дар ин бора сомонаи «Tuttomercatoweb» хабар медиҳад.
Тибқи иттилои ин расона роҳбарияти КФ «Гуанджоу Эвергаранд» ба футболбози турктабори «Барселона Арда Туран шартномаро барои се соли ҳунарнамоӣ дар ҳайати дастаи чинӣ пешбинӣ кардааст.
Клубҳои футболи Чин дар бозори харидуфурӯши бозингарони беҳтарини ҷаҳон рекорд мегузоранд. ВАО маоши аз ҳама баландтаринро дар ҷаҳони футбол ба Эсекиэл Лавесси, ҳамлагари дастаи «Хэбэй Форчун»-и Чин мансуб медонанд. Маоши ӯ ба 577 ҳазор евро (620 ҳазор доллар) дар як ҳафта баробар аст.
Барои қиёс: — маоши беҳтарин футболбози ҷаҳон Криштиану Роналду («Реал»-и Мадрид) ба 427 ҳазор евро (460 ҳазор доллар) ва Леонел Месси («Барселона») ба 316 ҳазор евро (338,5 ҳазор доллар) дар як ҳафта баробар аст.