Хадамоти гумрук маҳсулоти ба саломатии инсон зарароварро ошкор кард

Декабрь 21, 2016 14:02

ДУШАНБЕ, 21.11.2016 /АМИТ «Ховар»/. Раёсати минтақавии гумруки дар шаҳри Душанбе баҳри пешгирӣ, муайян ва ошкор намудани молу маҳсулоти тавассути қочок ба ҳудуди Ҷумҳурии Тоҷикистон воридшаванда, инчунин аз муомилот гирифтани молу маҳсулоти пастсифат ва ба саломатии шаҳрвандон хатардошта санҷишҳо гузаронид. Дар ин бора аз Хадамоти гумруки назди Ҳукумати Ҷумҳурии Тоҷикистон хабар доданд.
«Зарифи Маҳмадшариф, директори генералии ҶДММ «Кишвар-2010» аз рӯи маслиҳати пешакӣ бо дигарон ба содир намудани ҷиноят даст задааст. Ӯ дидаю дониста маҳсулотеро, ки ба талаботи бехатарӣ барои ҳаёт ва саломатии истеъмолкунандагон ҷавобгӯ намебошад, ба фурӯш баровардааст»,-хабар дод манбаъ.
Ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони мақомоти гумрук, прокуратура ва амният аз дохили анборҳои ҶДММ «Кишвар-2010» арақҳои тамғаи «Вайбер», «Кишвар», «Хӯшаи гандум», «Тоҷикистон кишвари ман», «Мирная водка», «Зелёный газон», «Секрет фирмы», «Дедушкин запас», «Гандумӣ», «Чистая проба», «Столичная», «Ашки гандум», «Сарез» ва конякҳои тамғаи «Кремлин», «Белый аист», «Кишвар», «Чёрный элексир», «Чёрный аист», «Жемчуг», «Столичная» ба микдори зиёда аз 15 000 адад шишаҳои гуногунҳаҷм ва зиёда аз 5000 литр машруботи спиртии тайёршуда, ки дар зарфҳои махсуси калонҳаҷми дохили ширкат нигоҳ дошта мешуданд, ёфта гирифта шуданд.
«Мувофиқи хулосаҳои Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон ва Хадамоти назорати давлатии санитарию эпидемиологии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар шаҳри Душанбе машруботи спиртии аз корхона ва анборхонаҳои ҶДММ «Кишвар-2010» дарёфтшуда машруботи спиртии ба талаботи стандарти давлатӣ номутобиқ буда, дорои сифати паст мебошад. Истеъмоли он ба саломатии инсон хатарнок мебошад»,- зикр намуд манбаъ.

Декабрь 21, 2016 14:02

Хабарҳои дигари ин бахш

Имрӯз дар Тоҷикистон ҳавои тағйирёбанда дар назар аст
ОМОДАГӢ БА ЗИМИСТОН. Дар 43 сардхонаи шаҳри Ҳисор беш аз 10 ҳазор тонна маҳсулоти кишоварзӣ захира карда мешавад
Муассисаҳои соҳаи тандурустии вилояти Суғд ба фасли зимистон омода мебошанд
Дар Душанбе ҷаласаи 35-уми Шурои ҳамоҳангсозии прокуророни генералии кишварҳои ИДМ оғоз гардид
ZET-MOBILE иқдоми навро оғоз кард: тарофаҳои «SUPER Қувва» бо тахфифи 50%
Имрӯз дар шаҳри Душанбе ҳаво то 28 дараҷа гарм мешавад
РӮЗИ ҶАҲОНИИ ОМОР. Тавассути омори расмӣ равандҳои муҳими иҷтимоӣ таҳлилу баррасӣ карда мешаванд
Нависандаи халқии Тоҷикистон Кароматуллоҳи Мирзо дар 83- солагӣ аз дунё даргузашт
Имрӯз дар водиҳои Тоҷикистон ҳаво то 30 дараҷа гарм мешавад
Дмитрий Семёнов: «Синамоҷашнвораи байналмилалии «Тоҷи Сомон» фазои ҳамкории байналмилалӣ фароҳам овард»
Имрӯз дар шаҳри Душанбе ҳаво то 26 дараҷа гарм мешавад
Дар Донишгоҳи техникии Тоҷикистон бахшида ба Иди Меҳргон ҳамоиш баргузор карда шуд