«Нақши зани тоҷик дар бунёди оила»: Конфронси маърифатӣ тарбиявӣ дар Суғд

ДУШАНБЕ, 08.12.2016 /АМИТ «Ховар»/. Дар Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷанд конфронси маърифатӣ тарбиявӣ таҳти унвони «Нақши зани тоҷик дар бунёди оила» баргузор гардид.
Тавре аз Хадамоти матбуоти вилояти Суғд хабар доданд, дар конфронс меҳмонон аз мақомоти иҷроияи ҳокимияти давлатии вилояту шаҳр, САҲШ, намояндагон аз Маркази солимӣрепродуктивӣ, Шўрои фаъолзанони вилоят ва олимаҳои донишгоҳ ширкат намуданд.
«Зимни маърўзаҳои сардори Раёсати кор бо занон ва оилаи Мақомоти иҷроияи ҳокимияти давлатии вилояти Суғд Нодира Мирзозода, сардори Раёсати сабти асноди ҳолатҳои шаҳрвандии вилоят Муқаддам Дадоҷонӣ, мудири шуъбаи Раёсати кор бо занон ва оилаи мақомоти иҷроияи ҳокимияти давлатии шаҳри Хуҷанд Муҳайё Дадобоева ва дигарон масъалаҳои мавқеи зан дар ҷомеа, тарбияи дурусти насли наврас, бунёди оила ва ба камол расонидани насли солим, эҳёи ҳунарҳои авлодӣ, аз қабили атласбофӣ, адрасбофӣ, сўзанидўзӣ, дўзандагӣ, ба роҳи дурусти зиндагӣ ҳидоят намудани ҷавонон, пешгирии шомилшавии наврасону ҷавонон ба ҳар гуна ҳизбу ҳаракат ва гурўҳҳои номатлуб, масъулияти падару модар дар назди фарзанд ва вазифаи фарзанд дар назди волидайн баррасӣ шуданд»,-зикр кард манбаъ.