Рамазон Раҳимзода ғолиби озмуни байналмилалии «Нашри беҳтарин» гардид

ДУШАНБЕ, 26.12.2016. /АМИТ «Ховар»/. Бо Қарори комиссияи тахассусии Академияи мақомоти ҳифзи ҳуқуқ дар назди Прокуратураи генералии Ҷумҳурии Қазоқистон, Вазири корҳои дохилӣ Рамазон Раҳимзода ғолиби Озмуни байналмилалии «Нашри беҳтарин барои муассисаҳои олии таълимӣ дар соҳаи фаъолияти мақомоти ҳифзи ҳуқуқ» таҳти унвони «Нашри беҳтарин оид ба проблемаҳои протсессуалии ҷиноятӣ, криминалистика ва назарияи фаъолияти оперативӣ-ҷустуҷӯӣ» гардид.
Тавре аз ВКД ҶТ хабар доданд, Рамазон Раҳимзода ташаббускори ҷорӣ намудани фанни фаъолияти оперативӣ-ҷустуҷӯӣ ҳамчун соҳаи алоҳидаи илми ҳуқуқ ва муаллифи китоби дарсии «Фаъолияти оперативӣ-ҷустуҷӯӣ», барномаи дарсии он ва тестҳо аз ин фан буда, муаллифи беш аз 100 асари илмӣ, китоби дарсӣ, рисолаҳо, монография, дастури таълимӣ, тафсир ба қонунҳо, мубориза ба муқобили ҷинояткорӣ, терроризм, экстремизм ва ҷиноятҳои иқтисодӣ мебошад.
Бояд гуфт, ки Рамазон Раҳимзода номзади илмҳои ҳуқуқ, Ҳуқуқшиноси шоистаи Тоҷикистон, барандаи Ҷоизаи Муҳаммад Осимӣ дар соҳаи илмҳои ҷомеашиносӣ буда, ҳамчунин аъзои ҳақиқии Академияи илмҳои умумиҷаҳонии амнияти дастаҷамъӣ мебошад.