Бонкҳои ВМКБ дар соли 2016 ба бонувони соҳибкор 11 млн 614 ҳазор сомонӣ қарзҳои имтиёзнок доданд

ХОРУҒ, 11.01.2017. /АМИТ «Ховар»/. Бонувони  соҳибкор бо мақсади ташкил ва тавсеаи корхонаҳои хурди истеҳсолӣ    соли гузашта аз филиалҳои мухталифи  бонкҳои марказӣ дар ВМКБ 11 млн 614 ҳазор сомонӣ қарз гирифтанд. Сардори шуъбаи кор бо занон ва оилаи мақомоти иҷроияи ҳокимияти давлатии ВМКБ Сайёра Замирова ба хабарнигори АМИТ «Ховар» иттилоъ дод, ки бо истифода аз ин маблағ бонувон  дар шаҳру ноҳияҳо корхонаҳои хурди дӯзандагию бофандагӣ,  коркарди шир ва  меваю сабзавотро ба роҳ андохтанд.
Дар айни ҳол як қисми ин корхонаҳо, ба мисли «Шириниҳои Помир», «Шири кӯҳистон» «Ҳаёт» бо маром фаъолият доранд ва бо маҳсулоти хушсифати худ харидорони зиёд пайдо намуда, аз ин ҳисоб теъдоди коргаронашон низ сол аз сол меафзояд.  Бо кумаку дастгирии Маркази таълимии калонсолон бештар аз 200 нафар занону духтарони ноҳияҳои Рӯшону Роштқалъа ба омӯзиши касбҳои дӯзандагию бофандагӣ ҷалб шуданд. Пас аз хатми омӯзиш дар деҳаи Сежди ноҳияи Роштқалъа корхонаи хурди коркарди пашми бузи ангорӣ (тибетӣ) ташкил ёфт, ки ҳоло дар он 60 нафар фаъолият доранд. Маҳсулоти корхона асосан ба хориҷи кишвар фурӯхта мешавад. Соли гузашта бо кумаку дастгирии шуъбаи кор бо занони ММҲД вилояти Суғд иддае аз бонувон  соҳиби шуғли нав, яъне адрасбофӣ гаштанд. Дар корхонаи дӯзандагии  Маркази бонувони ноҳияи Дарвоз 4 дона дастгоҳи адрасбофӣ васл гардид. Ҳоло 8 нафар занон баъди омӯзиши семоҳа ба адрасбофӣ машғул ҳастанд.