Хуршед Каримзода: «Воридот коҳиш ёфтааст, содирот афзоиш»

ДУШАНБЕ, 17.01.2017. /АМИТ «Ховар»/. Гардиши тиҷорати хориҷии Ҷумҳурии Тоҷикистон дар соли 2016-ум 3 миллиарду 930 миллион доллари амрикоиро ташкил дод, ки нисбат ба соли гузашта, беш аз 390 миллион доллар кам буда, 90,8 фоизро ташкил медиҳад.
Хуршед Каримзода, муовини аввали сардори Хадамоти гумруки назди Ҳукумати Ҷумҳурии Тоҷикистон 17 январ дар нишасти матбуотӣ ба хабарнигорон иттилоъ дод, ки аз маблағи умумии гардиши тиҷорати хориҷӣ 3 миллиарду 31 миллион доллар ба воридот ва наздик ба 900 миллион доллар ба содирот рост меояд. Дар қиёс ба соли 2015 воридоти молу маҳсулот ба ҷумҳурӣ беш аз 400 миллион доллар коҳиш ва содирот 8 миллион доллар афзоиш ёфтааст.
Хуршед Каримзода афзуд, ки омӯзиш ва таҳлили вазъи гардиши тиҷорати хориҷии кишвар бозгӯи он аст, ки дар соли сипаригардидаи 2016 бинобар омилҳои вазъи ноустувори молиявӣ дар бозори ҷаҳонӣ ва авзои сиёсӣ дар як қатор кишварҳои дунё, хусусан пастравии рушди иқтисодиёти шарикони асосии тиҷорати Тоҷикистон, талабот ба бархе аз молу маҳсулоти содиротию воридотӣ кам гардид. Гардиши савдои хориҷии кишварамон аз оғози соли гузашта давра ба давра коҳиш ёфта, тамоюли коҳишёбии он дар қиёс ба соли 2015 беш аз 9 %-ро ташкил дод.