Идигул Қосимзода: «Либоси миллӣ ба занони тоҷик мезебад»

ДУШАНБЕ, 27.01.2017 /АМИТ «Ховар»/. Либоси миллӣ ба занони тоҷик хеле мезебад. Ин нуктаро раиси Кумитаи кор бо занон ва оилаи назди Ҳукумати Ҷумҳурии Тоҷикистон Идигул Қосимзода имрӯз зимни нишасти матбуотӣ баён намуд.
Бино ба гуфтаи Идигул Қосимзода, дар вилояти Бадахшон занону духтарон либосҳои сирф миллӣ пӯшида, ба омӯзиш диққати бештар медиҳанд.
«Занону духтарони ин минтақа либосҳои ғайрро ба бар намекунанд ва доимо истиқлолияти Тоҷикистонро васф мекунанд. Ҳангоми суҳбату мулоқотҳо мо ба занон мефаҳмонем, ки онҳо бояд тақлид ба модару бибиҳо кунанд, на ба бегонагон»,-илова намуд раиси кумита.
Бо мақсади ташвиқи пӯшидани либосҳои миллӣ, хусусан чакан, атласу адрас ва тарзи дӯхти либосҳои миллӣ аз ҷониби Кумитаи кор бо занон ва оила соли 2016 дар ҷумҳурӣ якчанд фестивалҳои ҷумҳуриявии либоси миллӣ гузаронида шуданд.