Маркази миллии тестӣ барои омӯзгорони муассисаҳои таълимии шаҳри Хоруғ давраи омӯзишӣ баргузор кард

ХОРУҒ, 27.01.2017. /АМИТ «Ховар»/. Маркази миллии тестӣ бо мақсади шинос намудани хатмкунандагони макотиби таҳсилоти умумӣ бо низоми имтиҳонҳои марказонидаи дохилшавӣ ва тарзу шеваи имтиҳоноти тестӣ барои омӯзгорони муассисаҳои таълимии шаҳри Хоруғ давраи дурӯзаи омӯзишӣ баргузор кард. Раҳбари бахши вилоятии Маркази миллии тестӣ дар назди Президенти Ҷумҳурии Тоҷикистон Шаҳтут Хоников дар робита ба ин гуфт: «Дар ин рӯз омӯзгорон бо сохтори марказ ва тарзи фаъолияти он, низоми имтиҳонсупорӣ ва ҳуҷҷатнигорӣ ба таври комил шинос карда мешаванд. Баъди хатми омӯзиш ба омӯзгорон китоби «Раҳнамои довталаб», сабти видеоии давраи омӯзишӣ, намунаи тестҳо ва варақаи ҷавобҳо тақдим карда мешаванд».
Ин омӯзгорон дар оянда чун таблиғгар ҳақ доранд, ки бо ҳамкасбону шогирдон ва волидони онҳо доир ба низоми марказонидаи дохилшавӣ, гурӯҳбандии ихтисосҳо, тарзи дурусти посух ба суолҳои тестӣ мулоқоту суҳбатҳо баргузор намоянд.