Муколамаи озод байни мақомоти давлатӣ ва бахши хусусӣ бояд ташаккул дода шавад

ДУШАНБЕ, 26.01.2017. /АМИТ «Ховар»/. Раиси ноҳияи Спитамен Акрам Сулаймонзода зимни мулоқот бо соҳибкорон изҳор дошт, ки иҷрои дастуру супоришҳои Асосгузори сулҳу Ваҳдати миллӣ-Пешвои миллат муҳтарам Эмомалӣ Раҳмон ҷиҳати ташаккул додани муколамаи озод байни мақомоти давлатӣ ва бахши хусусӣ бояд дар амал татбиқ шавад. Ҳадафи асосии он мусоидат намудан ба рушди соҳибкорӣ, бартараф намудани монеаҳои мавҷуда ва дастгирии соҳибкорон мебошад.
Иттилоъ дода шуд, ки айни ҳол дар ноҳия зиёда аз 3 280 нафар соҳибкорон фаъолияти назаррас дошта, 26 корхонаи хусусии саноатӣ фаъолият доранд.
Дар натиҷаи ҳамкории муваффақонаи сохторҳои масъули давлатӣ бо бахши хусусӣ то имрӯз дар ноҳия корхонаҳои хурду миёнаи истеҳсоли зарфҳои полиэтиленӣ, коғазҳои санитарӣ, мебел, дару тирезаҳои пластикӣ, корхонаи истеҳсоли хишт, сафолакҳои ранга барои роҳҳои пиёдагард, сехҳои дӯзандагӣ ва истеҳсоли орд таъсис дода шудаанд.