Омилҳои иҷро нагардидани нақшаи ҷамъоварии пардохтҳои гумрукӣ дар чист?

ДУШАНБЕ, 17.01.2017/АМИТ «Ховар»/. Мақомоти гумруки Тоҷикистон нақшаи ҷамъоварии пардохтҳои гумрукиро ба андозаи 90,4% иҷро карда, дар соли 2016 ба Буҷети кишвар беш аз 3,8 миллиард сомонӣ пардохтҳои гумрукӣ ворид намуданд, ки дар қиёс ба нақшаи пешбинишуда зиёда аз 400 миллион сомонӣ кам аст. Ҳол он ки нақшаи ҷамъоварии пардохтҳои гумрукӣ дар соли 2016 зиёда аз 4, 3 миллиард сомонӣ пешбинӣ гардида буд.
Хуршед Каримзода, муовини аввали Сардори Хадамоти гумруки назди Ҳукумати ҷумҳурӣ омилҳои асосии иҷро нагардидани нақшаи ҷамъоварии пардохтҳои гумрукиро дар кишвар ба таъсири буҳрони молиявӣ ба иқтисодиёти ҷаҳон, коҳиш ёфтани ҳаҷм ва арзиши моли воридотӣ, хусусан молҳое, ки истеҳсолашон дар Тоҷикистон ба роҳ монда шудаанд, аз қабили семент, қолин, масолеҳи сохтмонӣ, маҳсулоти кишоварзӣ ва қаннодию гӯштӣ, пастравии арзиши нафт дар бозори ҷаҳонӣ, инчунин фаъолияти гузаргоҳи марзии Тоҷикистон бо Чин, мушкилоти транзитии молҳо тавассути қаламрави Афғонистон дар иртибот ба вазъи сиёсии ин кишвар рабт дод.