Паём ба мо роҳи созандагӣ меомӯзад

ДУШАНБЕ, 18.01.2017. /АМИТ «Ховар»/. Мақомоти иҷроияи ҳокимияти давлатии вилояти Хатлон бо мақсади баррасӣ ва шарҳи ҳамаҷонибаи Паёми навбатии Пешвои миллат Эмомалӣ Раҳмон ба Маҷлиси Олӣ гурӯҳҳои таблиғотӣ созмон дода, миёни аҳолӣ вохӯриву суҳбатҳо доир намуда истодааст.
Тавре аз Мақомоти иҷроияи ҳокимияти давлатии вилояти Хатлон хабар доданд, бо ин мақсад тайи ду рӯз гурӯҳҳои таблиғотӣ дар ноҳияи Дӯстӣ бо фаъолону ҷавонон, занон, ҷамоаҳои меҳнатӣ, адибон ва собиқадорони ҷангу меҳнати ноҳия дар толори мақомоти иҷроияи ҳокимияти давлатӣ, Ҷамоати деҳоти Ҷиликул, Ҷамоати деҳоти Навзамин, Ҷамоати деҳоти ба номи Гардӣ Гулмуродов, Ҷамоати шаҳраки 20-солагии Истиқлолият Ҷамоатҳои Деҳқонобод, Нури Вахш ва осоишгоҳи «Зам-зам» бо иштироки бевоситаи раиси ноҳия Салоҳиддин Раҷабзода вохӯриву сӯҳбатҳо баргузор намуданд.
Зимни вохӯриҳо иштирокчиён атрофи Паёми навбатии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон сухан гуфта, таъкид карданд, ки Паёми Пешвои миллат тоҷикистониёнро баҳри ворид гардидан ба марҳалаи нави рушди кишвар раҳнамун сохта, ҳар яки моро вазифадор менамояд, ки барои ояндаи дурахшони Тоҷикистони соҳибистиқлол саҳмгузор бошем.