Рамазон Раҳимзода: «34 гурӯҳи муташаккил дар ҳайати 169 нафар муайян ва дастгир карда шуданд»

ДУШАНБЕ, 20.01.2017. /АМИТ «Ховар»/. Дар соли 2016 дар ҷумҳурӣ 21 ҳазору 756 ҷиноят ба қайд гирифта шуд, ки нисбат ба соли гузашта 171 ҷиноят зиёд мебошад. Дар ин бора Вазири корҳои дохилии Ҷумҳурии Тоҷикистон Рамазон Раҳимзода имрӯз зимни нишасти матбуотӣ иттилоъ дод.
Ба таъкиди вазир, дар ҷараёни гузаронидани чорабиниҳои фаврӣ-ҷустуҷӯӣ ва амалиёти махсус 34 гурӯҳи муташаккил дар ҳайати 169 нафар муайян ва дастгир карда шуданд.
Вазири корҳои дохилӣ ба рӯзноманигорон барои ҳамкорӣ ва инъикоси шаффофи фаъолияти мақомоти корҳои дохилӣ дар матбуоти даврӣ изҳори миннатдорӣ намуда, гуфт: «Суботу оромӣ ва тинҷиву осудагӣ яке аз омилҳои рушду шукуфоӣ ва пешрафти ҷомеа буда, расидан ба ҳадафҳои созандаву бунёдкорӣ, пеш аз ҳама, аз вазъи муътадили сиёсии ҷумҳуриямон вобастагии калон дорад».
Зикр карда шуд, ки дар давраи ҳисоботӣ 4082 ҷинояти вазнин ба қайд гирифта шудааст. Соли гузашта ҳодисаҳои дуздию қаллобӣ ва авбошӣ аз ҳама зиёд ба қайд гирифта шудаанд.