Соли 2016 дар Суғд 98 коргоҳи нав бо 2,5 ҳазор ҷои корӣ ташкил гардид

ХУҶАНД, 17.01.2016. /АМИТ Ховар/. Имрӯз, 17 январ Раиси вилояти Суғд Абдураҳмон Қодирӣ дар толори Кохи матбуоти шаҳри Хуҷанд барои хабарнигорон нишасти матбуотӣ ташкил намуд. Дар он беш аз 60 нафар намояндагони воситаҳои ахбори оммаи дохиливу хориҷӣ иштирок намуданд.
Абдураҳмон Қодирӣ доир ба натиҷагирӣ аз фаъолияти соҳаҳои гуногуни иқтисодиёти вилоят дар соли 2016 зикр намуд, ки то 1 январи соли 2017 қисми даромади буҷети вилоятӣ ба андозаи 102,9% ва нақшаи ҷамъоварии андозҳо 101,8% иҷро гардида, соли сипаригашта аз ҷониби коргоҳҳои саноатии вилоят ба маблағи 6,9 млрд. сомонӣ маҳсулот истеҳсол карда шуд. Ҳаҷми истеҳсоли он нисбат ба ҳамин давраи соли 2015 — 139,5 фоизро ташкил дод.
Ҳамзамон дар миқёси шаҳру ноҳияҳои вилоят соли 2016 вобаста аз имкониятҳои мавҷуда 98 адад корхонаҳои нави саноатӣ бо теъдоди 2,5 ҳазор ҷойи нави корӣ ба кор андохта шуда, аз 110 номгӯй маҳсулоти саноатии истеҳсолшаванда истеҳсоли 72 намуд афзуд. Аз 622 коргоҳи саноатии ҳисоботдиҳанда 330 корхона сатҳи истеҳсоли маҳсулоташонро баланд бардоштанд.
Раиси вилоят иттилоъ дод, ки мақомоти иҷроияи ҳокимияти давлатии вилоят нақша дорад соли 2017 ҳаҷми истеҳсоли маҳсулоти саноатии коргоҳҳои вилоятро бо истифода аз иқтидори истеҳсолӣ то ба 1 миллиард доллари ИМА расонад.
Вобаста дар самти фаъолияти иқтисодии хориҷӣ А. Қодирӣ баён дошт, ки гардиши савдои хориҷии вилоят 1,8 млн доллари амрикоиро ташкил дода, ҳоло вилояти Суғд бо 59 мамлакат, аз ҷумла 10 кишвари ИДМ ва 49 мамолики хориҷи дур муносибати савдои хориҷӣ дорад.