Таснифоти даҳгонаи универсалӣ асоси фаъолияти китобдорист

ДУШАНБЕ, 31.01.2017. /АМИТ «Ховар»/. Давраи омӯзишии «Таснифоти даҳгонаи универсалӣ» (ТДУ) дар Маркази такмили ихтисоси Китобхонаи миллии Тоҷикистон, ки аз 24 майи соли 2016 оғоз шуда буд, ба анҷом расид. Дар ин муддат кормандони Китобхона оид ба ҷадвали даҳгонаи универсалӣ, таърихи пайдоиш ва тарзи рақамгузорӣ донишҳои амалии худро мукаммал карданд.
Дар ҷараёни машғулиятҳо ба толибилмон асосан дар бораи соҳаҳои муҳим, ба монанди идоракунии давлатӣ, маъмурӣ, маҳаллӣ, геология, кимиёи органикӣ, маъданшиносӣ, уқёнусшиносӣ, метеорология, табиатшиносӣ, кимиёи биологӣ, зоология, соҳаҳои тиб, беҳдошт, фармакология, паталогия, техника, умури муҳандисӣ, мошинсозӣ ва ғайра маълумот дода шуд.
Ҳамзамон мавзӯъҳои ҷудогона дар бораи техникаи ҳастаӣ, кишоварзӣ, боғу токпарварӣ, чорводорӣ, санъати тасвирӣ, санъати бофандагӣ, ҳайкалтарошӣ ва мусиқӣ омӯзонида шуданд.
Дар анҷоми давраи омӯзишӣ ба ширкаткунандагон сертификатҳои хатми давраи омӯзишии «Таснифоти даҳгонаи универсалӣ» дода шуданд.