З. Назирӣ: «Хуаксин Ғаюр-Суғд семент» барои ба ноҳияи саноатию аграрӣ табдил ёфтани ноҳияи Б.Ғафуров замина гузошт»

Б.ҒАФУРОВ, 19.01.2017. /АМИТ «Ховар»/. Дар соли 2016 корхонаҳои саноатии ноҳияи Бобоҷон Ғафуров ба маблағи 612,1 млн. сомонӣ маҳсулоти саноатӣ истеҳсол намуданд, ки нисбат ба ҳамин давраи соли гузашта 276,3 млн. сомонӣ зиёд аст. Дар ин бора Зариф Назирӣ, раиси ноҳия зимни нишасти матбуотӣ иттилоъ дод.
Ҳамчунин давоми соли 2016 дар ноҳия 10 адад корхонаи нави саноатӣ бо фарогирии 495 ҷои корӣ ба истифода дода шуд. Фаъолгардии коргоҳи нави азими муштараки «Хуаксин Ғаюр-Суғд семент» ба ноҳияи саноатию аграрӣ табдил ёфтани ноҳия замина гузошт. Дар ин замина, қисми даромади буҷети давлатӣ дар соли 2016 101,4 фоиз иҷро гардид.
З.Назирӣ оид ба омодагиҳо ба таҷлили 20 — солагии Ваҳдати миллӣ баён дошт, ки дар ин самт дар ноҳия корҳои ташкиливу омодагӣ ва созандагиву бунёдкорӣ ҷараён гирифта, тибқи он сохтмони чанд иншоот ба нақша гирифта шудааст.