Ғалабаи сеюми «Истиқлол» дар Ҷоми ФФТ

ДУШАНБЕ, 25.02.2017 /АМИТ «Ховар»/. Дастаи «Истиқлол»-и Душанбе дирӯз баъди ғалаба дар бозии финалии Ҷоми ФФТ бар  «Регар — ТадАЗ»-и Турсунзода  бо натиҷаи 2:1 маротибаи сеюм соҳиби Ҷоиза гардид.

Мубориза дар майдонии бозӣ ниҳоят тезутунд буд. Дилшод Восиев баъди дар нимаи дуввум ба майдон омаданаш қаҳрамони ин вохӯрӣ гардида, дар дақиқаи 67-ум ҳисобро кушод. Як дақиқа пеш аз анҷоми вақти асосӣ бо кумаки Ҷаҳонгир Алиев, ки ӯ низ дар нимаи дуввум ба майдон омада буд, Дилшод голи дуввуми худ ва дастаашро ба нишон расонида, масъалаи ғолибиятро дар ин бозӣ ҳаллу фасл кард. Капитани «Регар – ТадАЗ» Алишер Шарифов (90+3) дар ҷамъабасти бозӣ голи тасаллиятро ба дарвозаи Никола Стошич зад.

Дар ин вохӯрӣ Сиёвуш Асроров (31-ум дақиқа) баъди дағалӣ бо корти сурх аз майдон ронда шуд. Дар мавриди дигар капитани «Истиқлол» Фатҳулло Фатҳуллоев зарбаи ҷаримавии 11 метра-пеналтиро (29-ум дақиқа) ба нишон нарасонид. Дарвозабони «Регар — ТадАЗ» Далер Азизов онро дошта гирифт.

Баъди анҷоми вохӯрии финалӣ роҳбарони ФФТ ба ғолибон ва барандагони ҷойи якум-«Истиқлол»,дуввум-«Регар — ТадАЗ» ва сеюм-«Кӯктош» медалҳо ва Ҷоми мусобиқаро супориданд.

Ҷоми ФФТ. Финал

«Истиқлол» (Душанбе) — «Регар — ТадАЗ» (Турсунзода) -2:1.

Муаллифи голҳо: Дилшод Восиев  67 (1:0), Дилшод Восиев 89 (2:0),Алишер Шарифов 90+3 (2:1)

Пеналтӣ: Фатҳулло Фатҳуллоев «Истиқлол» 29, дарвозабон.

Ҳайати дастаҳо: «Регар-ТадАЗ» (Турсунзода): Далер Азизов, Алишер Шарифов, Фаррух Чориев, Фарҳод Холбеков (Комрон Турсунов, 77), Фирӯз Қараев, Расул Файзов, Бахтиёр Қаландаров, Бахтиёр Чориев, Шерзод Маҳамадиев (Азиз Мансуров, 78), Азим Тошев, Евгений Хотимский.

«Истиқлол» (Душанбе): Никола Стошич, Сиёвуш Асроров, Дэвид Мавутор (Соҳиб Саванқулов, 90+2), Артем Барановский, Амирбек Ҷӯрабоев, Нуриддин Давронов, Аҳтам Назаров, Ҷахонгир Эргашев (Ҷахонгир Алиев, 59), Фатҳулло Фатҳуллоев (Ромиш Ҷалилов, 75), Манучеҳр Ҷалилов (Дилшод Восиев, 59), Дмитрий Барков.

Огоҳӣ: Нуриддин Давронов, Аҳтам Назаров («Истиқлол»), Далер Азизов, Алишер Шарифов, Бахтиёр Чориев («Регар-ТадАЗ»).

Аз майдон ронда шуд: Сиёвуш Асроров («Истиқлол»), 31 – ум дақиқа, барои бо сар зарба задан ба рақиб .

Довари майдон: Сайвалӣ Турдиев (Қӯрғонтеппа) – 7,8.

Нозири доварон: Раҳимҷон Шарифов (Душанбе).

Комиссари бозӣ: Эраҷ Носеҳов (Душанбе).