Ҷамшед Каримзода бо ҳайати Бонки ҷаҳонӣ мулоқот кард

ДУШАНБЕ, 16.02.2017 /АМИТ «Ховар»/. Дирӯз Ҷамшед Каримзода, муовини якуми Вазири молияи Ҷумҳурии Тоҷикистон бо ҳайати Бонки ҷаҳонӣ таҳти роҳбарии менеҷери гурӯҳ оид ба таъсиси ҷойҳои корӣ Дейвид Робалино мулоқот намуд.
Тавре аз котиботи Вазорати молияи Ҷумҳурии Тоҷикистон иттилоъ доданд, дар мулоқот намояндагони Бонки ҷаҳонӣ ҳисоботро дар мавзӯи «Таҳқиқ ва дурнамои таъсиси ҷойҳои корӣ дар Ҷумҳурии Тоҷикистон» пешниҳод намуданд.
Дар мулоқот ҷонибҳо дар мавзӯи барномаҳои амал бобати таъсиси ҷойҳои корӣ, аз ҷумла андешидани тадбирҳои сиёсию барномавӣ, ки ба рушди кишвар мусоидат менамоянд, мубодилаи афкор намуданд.
Тибқи иттилои манбаъ, иштирокдорони мулоқот ҳамчунин марҳалаҳои минбаъдаи ҳамкориро бобати сари вақт амалӣ намудани барномаҳои амал, ки ба таъсиси ҷойҳои корӣ мусоидат менамоянд, муайян намуданд.