Берун аз футбол: дарвозабони ветнамӣ ҷазо гирифт

ДУШАНБЕ, 25.02.2017 /АМИТ «Ховар»/. Дарвозабони дастаи «Донгтам Лонган»-и Ветнам Нгуен Мин Нхутро Федератсияи футболи ин кишвар барои махсус дар даври шашуми Чемпионати Ветнам дар муқобили дастаи «Ҳошимин» (2:5) гол сар доданаш ба муҳлати ду сол аз футбол маҳрум кард.

Ба чунин муҷозот ҳамдастаи Нхут-муҳофизатгар Хюин Куанг, ки дар ҳайати дастаи мунтахаби Ветнам 45 бозӣ гузаронидааст, низ гирифтор шуд. Ба ғайр аз ин ду бозингар сармураббии дастаи «Донгтам Лонган» ва президенти клуб ба муддати 3 сол аз фаъолият дар футбол  дур карда шуданд. Клуби «Донгтам Лонган» -ро низ ҷазо дода,  ба маблағи 6,6 ҳазор евро ҷарима бастанд.

19 феврал дарвозабони дастаи «Донгтам Лонган» Нгуен Мин Нхут  хатои довари майдонро сабаб шуморида, аз меҳмони худ –дастаи «Хошимин» дидаю дониста ба дарвозааш се гол сар дод.

Вохӯрии даври навбатии Чемпионтаи Ветнам бо ширкати дастаҳои «Донгтам Лонган» ва «Ҳошимин» то дақиқаи 90-ум мусовӣ- 2:2 идома дошт. Дар ҳамин вақт довар ба дарвозаи дастаи мизбон -«Донгтам Лонган» зарбаи 11-метраи шубҳанок таъйин кард. Дарвозабон аз ин қарор сар печида, пушташро ба иҷрокунандаи зарбаи пеналтӣ гардонд ва боз то анҷоми вақти иловашуда ба муҳофизатгар имкон дод, ки ҳарифон ба дарвозааш ду голи дигар зананд.

Бозӣ бо ғалабаи дастаи «Ҳошимин» бо натиҷаи 5:2 ба анҷом расид. «Донгтам Лонган» дар зинаи 14 ва «Ҳошимин» дар зинаи 8-уми Чемпионати Ветнам қарор доранд.