Бозхонд ва интихоб намудани судяҳои Суди Олӣ

ДУШАНБЕ, 16.02.2017. /АМИТ «Ховар»/. Дар асоси пешниҳоди Президенти Ҷумҳурии Тоҷикистон ва қарорҳои Маҷлиси миллии Маҷлиси Олии Ҷумҳурии Тоҷикистон ду нафар судяи Суди Олии Ҷумҳурии Тоҷикистон Насим Ҳасанзода ва Рошиддин Қамарзода аз вазифаи судяи Суди Олии Ҷумҳурии Тоҷикистон бозхонд гардиданд.
Дар иҷлосияи нуҳуми Маҷлиси миллӣ, ки имрӯз дар Душанбе доир гардид, аъзои палатаи болоии Парлумони Тоҷикистон ҳамзамон ба пешниҳоди Президенти кишвар дар бораи Раиси Суди Олии иқтисодии Ҷумҳурии Тоҷикистон интихоб намудани Мавлуда Қаландарзода, инчунин дар бораи интихоб намудани Рошиддин Қамарзода, Исроил Мирзозода ва Маҳмадисо Саидзода ва бозхонд намудани Наим Мансурзода аз вазифаи раиси Суди Олии иқтисодии Ҷумҳурии Тоҷикистон ризоият доданд.