Бозиҳои ниҳоии Ҷоми ФФТ аз 13-уми феврал шурӯъ мешаванд

ДУШАНБЕ, 11.02.2017/АМИТ «Ховар»/. Бозиҳои ниҳоии Ҷоми ФФТ аз 13-уми феврал шурӯъ мешаванд. Расми қуръакашӣ дирӯз дар Муассисаи давлатии ТВ Варзиш мустақиман гузаронида шуд, ки ин дар таърих бори аввал аст.
Дастаҳо ба ду гурӯҳи баробар ҷудо шудаанд. Ба ҳамин тартиб ба гурӯҳи «А» «Ҳосилот» (Фархор), «Кӯктош» (Рӯдакӣ), «Равшан» (Кӯлоб) ва «Хуҷанд» (Хуҷанд), ба гурӯҳи «Б» «Регар-ТадАЗ» (Турсунзода), «Истиқлол» (Душанбе), «Ҳулбук» (Восеъ) ва «Ашт» (Ашт) шомил шуданд.
Дастаи «Хайр»-и Ваҳдат, ки ба мусобиқаи ниҳои роҳхат гирифта буд, аз иштирок дар бозиҳои ниҳоӣ даст кашид ва ба ҷои он «Истиқлол»-и Душанбе, ки соҳиби зинаи сеюми гурӯҳи «Б»-и минтақаи Душанбе гардида буд, бозӣ мекунад.
Ёдовар мешавем, ки аз рӯи низомномаи мусобиқа ду дастаи беҳтарин аз ҳар гурӯҳ барои Ҷом мубориза мебаранд.
Дар даври аввали мусобиқа «Равшан» бо «Ҳосилот» (13-уми феврал, соати 12:30) ва «Хуҷанд» бо «Кӯктош» (соати 15:00) вориди майдон мешаванд.