Дар ноҳияи Шоҳмансур ҳамоиш баргузор гардид

ДУШАНБЕ, 28.02.2017 /АМИТ «Ховар»/. Бо ташаббуси ташкилоти ибтидоии «Созанда» — и Кумитаи иҷроияи ҲХДТ дар ноҳияи Шоҳмансур бахшида ба қабул гардидани Қатъномаи Даҳсолаи байналмилалии амал «Об барои рушди устувор», барои солҳои 2018-2028 ҳамоиш баргузор гардид,
Ҷӯрабек Муродов, раиси ташкилоти ибтидоии «Созанда» доир ба саҳми сазовори Қатъномаи мазкур дар ҷумҳурӣ ва берун аз он дар масъалаҳои марбут ба об ибрози андеша намуд.
Номбурда аз ҷумла зикр кард, ки об қудрати созандагию ободонӣ, вайронсозиву барбоддиҳандагӣ дошта, муайянкунандаи иқлим, оинаи сатҳи замину маҳлулкунанда, ҳомили ҳар гуна моддаҳои ғайриорганикӣ буда, ба таҳшиншавии ҷинсҳо ва ба вуҷуд омадани хок (гил) кумак мерасонад. Табиат бо тамоми ҳастиаш гуворост, вале об накӯтарин мӯъҷизаи он аст. Об унсурест, ки табиати хобидаро ба бедорӣ водор месозад.
Сипас Зулфиқор Гулаҳмадзода, раиси Кумитаи иҷроияи ҲХДТ дар ноҳияи Шомансур ва дигар аъзои ҳизб аз иштирокдорони ҳамоиш даъват ба амал оварданд, ки дар амалӣ намудани корҳои фаҳмондадиҳӣ ҷиҳати баррасии нуктаҳои муҳими ин Қатънома дар тамоми кумитаву ташкилотҳои ибтидоии ҳизбӣ фаъол бошанд.