Дар шаҳри Норак бахшида ба Рӯзи байналмилалии забони модарӣ семинар доир шуд

ДУШАНБЕ, 21.02.2017. /АМИТ «Ховар»/. 20 феврал бо ташаббуси шуъбаи рушди иҷтимоӣ ва робита бо ҷомеаи дастгоҳи раиси шаҳри Норак бахшида ба Рӯзи байналмилалии забони модарӣ семинари омӯзишӣ доир шуд. Дар ин бора мудири шуъбаи рушди иҷтимоӣ ва робита бо ҷомеаи шаҳр Ҳабиба Сафарова ба АМИТ «Ховар» иттилоъ дод.
Тибқи иттилои манбаъ, семинар бо мақсади риояи талаботи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», қарори Ҳукумати Ҷумҳурии Тоҷикистон «Дар бораи тасдиқи қоидаҳои имлои забони тоҷикӣ» ва дастурамали коргузорӣ роҳандозӣ гардид.
Дар семинари омӯзишӣ кормандони корхонаю муассисаҳои шаҳр иштирок намуда, масъулин роҷеъ ба аҳамият, нақш, вазифа, моҳияти забон ва риояи қоидаҳои имлои забони тоҷикӣ сухан гуфтанд.