«Кадбонуи беҳтарин» — эҳёгари ҳунарҳои мардумӣ

ДУШАНБЕ, 14.02.2017 /АМИТ «Ховар»/. Бахшида ба таҷлили ҷашни байналмилалии Наврӯз дар шаҳру ноҳияҳои ҷумҳурӣ озмунҳои гуногун идома доранд. Бино ба иттилои Фазлиддин Маҳмадраҳимзода, корманди шуъбаи иттилоотию таҳлилии дастгоҳи раиси вилояти Хатлон, дар маркази ноҳияҳои Ҷайҳун ва Панҷ бо ташаббуси Раёсати кор бо занон ва оилаи мақомоти иҷроияи ҳокимияти давлатии вилояти Хатлон бахшида ба ин ҷашн бо иштироки занону духтарон озмуни ноҳиявии «Кадбонуи беҳтарин» баргузор гардид.
Мақсади озмун густариши ҳунарҳои пазандагӣ, эҳёи ҳунарҳои мардумӣ, дарёфти кадбонуҳои беҳтарин, аз қабили пазандагони моҳири таомҳои қадимӣ ва замонавӣ ва ба ин васила, тарғиби расму оинҳои миллӣ буда, аз роҳандозии ҳунари кадбонугии бонувон, ҷалби духтарон ба ҳунари пазандагӣ, эҳёи таомҳои миллӣ, ҷалби бонувони хонанишин ба корҳои ҷамъиятӣ иборат мебошад.
«Шартҳои асосии озмуни мазкур аз намоиши дастархони наврӯзӣ, ҳунарҳои кадбонугӣ, таомҳои миллии қадимӣ ва замонавӣ, тайёр намудани хӯришҳо, маҳсулоти нонӣ, аз қабили кулча, чаппотӣ, фатир, гирдача, шириниҳо, кулчақанд ва як таоми миллӣ иборат буданд»,-иброз дошт Фазлиддин Маҳмадраҳимзода.