Миср ва Камерун дар бозии ниҳоии Ҷоми Африка

ДУШАНБЕ, 03.02.2017/АМИТ «Ховар»/. Дастаҳои мунтахаби Миср ва Камерун ба бозии ниҳоии Ҷоми Африка, ки дар Габон идома дорад, роҳхат гирифтанд. Тавре сомонаи мусобиқа иттилоъ медиҳад, вохӯрии аввали нимниҳоӣ бо иштироки дастаи мунтахаби Миср ва Буркина Фасо дар дар вақти асосӣ бо натиҷаи мусовии 1:1 ҷамъбаст шуд ва дар задани силсилаи зарбаҳои пеналтии баъдибозӣ чемпионҳои ҳафткаратаи ин қитъа-мисриҳо бо нишондоди 4:3 ба пирӯзӣ расиданд. Баъди соли 2010 дастаи мунтахаби Миср бори аввал ба бозии ниҳоӣ баромад.
Дар ҷуфти дуюми вохӯрии нимниҳоӣ дастаҳои мунтахаби Камерун ва Гана вориди майдон шуданд. Ду голи Майкл Нгаду-Нгаҷуй (72) ва Кристиан Муганг (90+3) футболбозони Камерунро ба бозии ниҳоӣ раҳсипор карданд.
4 феврал дастаҳои мунтахаби Буркина Фасо ва Гана барои медалҳои биринҷӣ ва 5 феврал Миср бо Камерун барои Ҷом вориди рақобат мешаванд.
Ёдрас мешавем, ки бозиҳои ниҳоии Ҷоми Африка ҳар ду сол гузаронида мешаванд. Соли 2015 дар бозии финалӣ дастаҳои мунтахаби Кот-дИвуар (Соҳили Оҷ) ва Гана бо ҳам вохӯрданд. Кот-дИвуар бо ҳисоби 9:8 (0:0, вақти асосӣ) аз зарбаҳои пеналтӣ пирӯз гардида, унвони чемпиониро соҳиб шуда буд.