Озмуни «Авто-Бону-2017» — эҳдо ба Рӯзи Модар

ДУШАНБЕ, 14.02.2017. /АМИТ «Ховар»/. Бахшида ба ҷашни Рӯзи Модар ва Соли ҷавонон Раёсати Бозрасии давлатии автомобилии Вазорати корҳои дохилии Ҷумҳурии Тоҷикистон ва рӯзномаи «Вечёрка» тасмим гирифтаанд, ки озмуни «Авто-Бону-2017»-ро баргузор намоянд.
Тавре аз РБДА Вазорати корҳои дохилӣ хабар доданд, озмуни «Авто-Бону-2017» 4 марти соли равон соати 10:00 дар автодроми автоматонидашудаи ба номи А.Турсунов, воқеъ дар километри 7-уми кӯчаи Садриддин Айнӣ баргузор мегардад.
Бояд гуфт, ки озмун аз рӯи 5 давр- «Варақаи боздид» — «Ман ва автомобилам» (ороиши автомобил), мусобиқаи «Донандагони қоидаҳои ҳаракати роҳ», рондани воситаи нақлиёт дар Автодром, «Ёрии аввалини тиббӣ», «Намоиши овезаи тарғиботӣ» гузаронида мешавад.
Ғолибони озмун бо мукофоти пулӣ- ҷойи якум 3000 сомонӣ, ҷойи дуюм 2500 сомонӣ ва ҷойи сеюм 2000 сомонӣ сарфароз гардонида мешаванд.