Роҳпаймоии ҷавонони Рӯшон бахшида ба Соли ҷавонон

ДУШАНБЕ, 14.02.2017. /АМИТ «Ховар»/. 13 феврал дар маркази ноҳияи Рӯшон ба ифтихори Соли ҷавонон эълон шудани соли 2017 роҳпаймоӣ баргузор шуд, ки дар он ҳудуди 1000 нафар ҷавонони гуногункасб ширкат варзиданд. Роҳпаймоӣ аз назди бинои мақомоти иҷроияи ҳокимияти давлатии ноҳия то бинои интернати давлатии ҷумҳуриявӣ таҳти суруди ватандӯстонаи ҷавонон ва партавафшонии парчами давлатӣ, аксҳои Пешвои миллат ва шиорҳои сиёсӣ сурат гирифт.
Дар саҳни бинои интернат, ки бо рамзҳои давлатӣ, аксҳои Пешвои миллат ва шиору овезаҳо оро ёфта буд, ҳамоиши бошукӯҳ баргузор шуд. Иҷрокунандаи вазифаи раиси ноҳияи Рӯшон Хоҷаназар Имомназар гуфт, ки роҳпаймоии ҷавонони мамлакат, ки имрӯзҳо дар саросари кишвари азизамон ҷараён дорад, шаҳодати ҷонибдорӣ аз сиёсати хирадмандонаи Президенти Ҷумҳурии Тоҷикистон, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон мебошад. Чавонони имрӯза чун ворисони содиқи Оли Сомон ва пайравони фидокори Пешвои миллат дар сафи пеши созандагию бунёдкорӣ қарор гирифта, дар ҳифзи марзу буми Ватан бо андӯхтани илму ҳунар, такмили ахлоқу маърифат, аз худ кардани технологияи муосири иттилоотию коммуникатсионӣ дар ҷанбаҳои гуногуни хоҷагии халқ сарбаландона саҳмгузорӣ менамоянд.
Аз ҷониби Сарвари давлат Соли ҷавонон эълон шудани соли 2017 рамзӣ буда, тамоми табақаҳои аҳолиро гирди онҳо муттаҳид месозад. Иҷрокунандаи вазифаи раиси ноҳия бо ифтихор аз муваффақиятҳои ҷавонони ноҳия дар соҳаҳои илму маориф, фарҳанг ва варзиш тамоми ҷавононро даъват намуд, ки комёбиҳояшонро афзун намуда, ҳамчун пайравони воқеии Пешвои миллат дар ободию шукуфоии Тоҷикистони азиз ҳиссаи сазовори худро гузоранд.