Шариф Комилзода: «Артиши миллии Тоҷикистон дар 24 соли фаъолияташ рисолати бузурги хешро содиқона анҷом дод»

ДУШАНБЕ, 21.02.2017. /АМИТ «Ховар»/. «Нақши Артиши миллӣ дар таҳкими истиқлолияти давлатии Тоҷикистон»- таҳти чунин унвон имрӯз дар Пажӯҳишгоҳи илмӣ- тадқиқотии фарҳанг ва иттилооти Вазорати фарҳанги Ҷумҳурии Тоҷикистон ҳамоиши илмӣ доир гардид. Дар ҷаласа Шариф Комилзода, Директори Пажӯҳишгоҳи илмӣ- тадқиқотии фарҳанг ва иттилоот баён дошт, ки Артиши миллии Тоҷикистон дар солҳои аввали соҳибистиқлолӣ дар вазъияти бисёр вазнини сиёсиву иқтисодии кишвар таъсис ёфт. 23 феврали соли 1993 бори аввал намоиши паради ҳарбии Артиши миллӣ баргузор гардид ва он рӯз расман санаи таъсиси Қувваҳои мусаллаҳи Ҷумҳурии Тоҷикистон эълон шуд.
«Артиши миллӣ бо вуҷуди надоштани заминаи моддию техникии пуриқтидор дар солҳои душвори муқовиматҳои дохилӣ таҷриба андӯхта, дарси ҷангию муҳорибавиро ҳамаҷониба омӯхт. Баъд аз андешидани тадбирҳои пайвастаи Ҳукумати Ҷумҳурии Тоҷикистон Артиши миллӣ марҳила ба марҳила устувору қавитар гардида, бо техникаву таҷҳизоти муосир таъмин шуд ва ба неруи пурқудрати дорои ҷузъу томҳои замонавӣ табдил ёфт»,- гуфт Шариф Комилзода.
Ҳамчунин директори Пажӯҳишгоҳи илмӣ- тадқиқотии фарҳанг ва иттилоот изҳор намуд, ки Артиши миллии Ҷумҳурии Тоҷикистон дар тӯли 24 соли фаъолияташ рисолати бузурги хешро ҷиҳати ҳифзи марзу буми сарзамини аҷдодӣ, таъмини осоишу оромии қаламрави мамлакат ва ҳимояи манфиатҳои Ватан содиқона анҷом дод. Имрӯз низ Артиши миллӣ барои дар амал татбиқ намудани ҳадафҳои давлату миллат пайваста кӯшиш менамояд.