Вазири корҳои хориҷии Алҷазоир таъйини нахустин сафири Тоҷикистон дар Алҷазоирро рӯйдоди муҳим номид

ДУШАНБЕ, 22.02.2017. /АМИТ «Ховар»/. 20 феврали соли 2017 дар Алҷазоир Вазири давлатӣ, Вазири корҳои хориҷӣ ва ҳамкории байналмилалии Ҷумҳурии Халқии Демократии Алҷазоир Рамтон Лаъмомра Сафири Фавқулода ва Мухтори Ҷумҳурии Тоҷикистон дар он кишвар Хусрав Нозириро ба муносибати супоридани нусхаи эътиборнома ба ҳузур пазируфт.
Вазири корҳои хориҷии Алҷазоир бо истиқбол аз таъйин шудани нахустин сафири Тоҷикистон дар Алҷазоир, онро рӯйдоди муҳим дар раванди густариши муносибатҳои дуҷониба номид. Бо ишора ба нахустин боздиди расмии Президенти Ҷумҳурии Тоҷикистон Эмомалӣ Раҳмон аз Ҷумҳурии Халқии Демократии Алҷазоир, ки 10-12 марти соли 2008 баргузор гардида, дар ҷараёни он бастаи мувофиқатномаҳои муҳим ба имзо расида буд, ӯ таъкид намуд, ки сафари мазкур барои тавсиа ва таҳкими ҳамкории мутақобилан судманд байни ду кишвари дӯст дар соҳаҳои гуногун заминаи пойдор гузошт.
Мулоқот бо таъкиди зарурати идома ва густариши ҳамкории самарабахши ду кишвар дар сатҳи муносибатҳои дуҷониба ва дар чаҳорчӯби созмонҳои байналмилаливу минтақавӣ ба поён расид.