126 нафар ба омӯхтани касбҳои қолинбофӣ, сабадбофӣ, қаннодӣ ва адрасбофӣ ҷалб гардиданд

ВАҲДАТ, 10.03.2017. /АМИТ «Ховар»/. Дар соли равон бори дуюм аст, ки Раёсати Агентии меҳнат ва шуғли аҳолии шаҳри Ваҳдат ярмаркаи ҷойҳои кориро бо иштироки  корхона ва муассисаҳои шаҳр доир мекунад.

Тибқи иттилои муовини  сардори шуғли аҳолии шаҳри Ваҳдат Салима Абдуллоева, аз  ҷониби 28 корхонаю муассиса 143 ҷойи корӣ пешниҳод гардид. Дар ярмарка 430 нафар шаҳрвандони корҷӯй иштирок намуда, 30 нафар барои кор роҳхат гирифтанд.

Инчунин дар соли 2017 дар филиали  муассисаи давлатии маркази таълимии  калонсолон дар шаҳри Ваҳдат ба омӯхтани касбҳои қолинбофӣ, сабадбофӣ, қаннодӣ, адрасбофӣ, дӯзандагӣ, омӯзиши компютер, кулолгарӣ ва ниҳолпарварӣ 126 нафар ҷалб гардиданд, ки аз ин шумора 89 нафарро ҷавондухтарон ва занони хонашин ташкил медиҳанд.