Дар Конибодом даври шаҳрии озмуни «Кадбонуи беҳтарин» ҷамъбаст шуд

ХУҶАНД, 04.03.2017. /АМИТ «Ховар»/.  Дар шаҳри Конибодом даври шаҳрии озмуни «Кадбонуи беҳтарин» ба ифтихори ҷашни байналмилалии Наврӯз ҷамъбаст гардид. Дар озмуни мазкур занону бонувони ҳунарманд аз ташкилоту муассисаҳо, ҷамоатҳои деҳот, коллеҷу литсейҳои касбӣ иштирок намуда, маҳсули ҳунарҳои дастии худро ба маърази тамошо гузоштанд.

Тавре ба хабарнигори минтақавии АМИТ «Ховар» аз шуъбаи кор бо занон ва оилаи мақомоти иҷроияи ҳокимияти давлатии шаҳр иттилоъ доданд, ҳадаф аз ташкили озмун, пеш аз ҳама, тарғибу ташвиқи фарҳангу арзишҳои миллӣ, эҳёи ҳунарҳои мардумиву хӯрокҳои миллӣ ба ҳисоб рафта, он аз рӯи 6 шарт байни бонувони соҳибҳунари шаҳр гузаронида шуд.

Дар ҷараёни озмун кадбонуҳо бо маҳорати хуб ва услуби хоса ҳунарҳои худро дар пазандагиву ороишоти хони идона пешкаши ҳозирон доштанд.

Дар ҷамъбаст байни ташкилоту муассисаҳо — беморхонаи марказӣ, байни ҷамоатҳои деҳот — Ҷамоати деҳоти ба номи А. Лоҳутӣ ва байни коллеҷҳо — коллеҷи тиббӣ беҳтарин дониста шуданд.