Дар ноҳияи Спитамен ба пешвози Наврӯзи фаррухпай «Дастурхони наврӯзӣ» ороста шуд

ХУҶАНД. 16.03.2017 /АМИТ «Ховар»/. Дар арафаи ҷашни байналмилалии  Наврӯз  дар ноҳияи Спитамени вилояти Суғд ҳамарӯза чандин барномаҳои мухталифи фарҳангию фароғатӣ баргузор мегарданд.

Тавре ба АМИТ «Ховар» аз шуъбаи фарҳанги ноҳия иттилоъ доданд,  тибқи нақшаи шуъбаи фарҳанги ноҳия ба муносибати ин ҷашн дар чанд ҷамоати шаҳраку деҳот озмунҳои «Кадбонуи беҳтарин», «Бунафша» ва озмуни пухтупази таомҳои милливу аврупоӣ таҳти унвони «Дастурхони наврӯзӣ» баргузор гардида, ғолибону иштирокдорони фаъол бо ифтихорномаву туҳфаҳои хотиравии Мақомоти иҷроияи ҳокимияти давлатии ноҳия сарфароз гардиданд.

Масъулин ҳадафи чунин озмунҳоро ба арҷгузорӣ ба меросу анъанаҳои аҷдодӣ, эҳё намудани урфу одатҳои гузаштагон рабт доданд.

Ҳамчунин дар доираи барномаҳои наврӯзӣ дар маркази ноҳия озмуни «Мақомхонони ҷавон» ва дар қасри фарҳанг барномаи «Армуғони наврӯзӣ» бо иштироки санъаткорони қасри маданияти ноҳия гузаронида мешаванд.