Дар шаҳри Ваҳдат маҳфили «Ҳидоятгарони дунёи маънӣ» бахшида ба Рӯзи Модар доир гардид

ВАҲДАТ, 03.03.2017./АМИТ «Ховар»/. Дирӯз дар толори кохи «Маърифат»-и шаҳри Ваҳдат бо иштироки занону модарон, собиқадорони китобхонаҳои шаҳри Ваҳдат Хайринисо Нурова, Сайлинисо Раҳимова, Руқия Солиҳова ва Зайнаб Оқилова бахшида ба Рӯзи Модар маҳфили идона доир  гардид. Дар ин бора аз бахши ҷавонони шаҳри Ваҳдат ба хабарнигори АМИТ «Ховар»  иттилоъ доданд.

Дар маҳфил зиёда аз 160 нафар дӯстдорони каломи бадеъ ҷамъ омаданд. Қаҳрамонони маҳфил перомуни ҳаёту фаъолияти чандинсолаи хеш сухан гуфта, аз ташкил намудани чунин чорабинӣ арзи миннатдорӣ баён намуданд. Инчунин аз тарафи кормандони китобхонаи марказӣ саҳначаи тарбиявӣ ҷиҳати иҷрои Қонуни Ҷумҳурии Тоҷикистон «Дар бораи танзими анъана ва ҷашну маросимҳо» бо як ҷаҳон маънӣ пешкаши ҳозирин гардид.

Барномаи ҳунарӣ аз ҷониби сарояндагону раққосони шаҳр  ба маҳфил ҳусни тоза зам намуд.