Дар Япония иқтидори сайёҳии Тоҷикистон муаррифӣ гардид

ДУШАНБЕ, 04.03.2017 /АМИТ «Ховар»/. Дар Сафорати Ҷумҳурии Тоҷикистон дар Япония 28 феврал семинар дар мавзӯи «Иқтидори сайёҳии Тоҷикистон» баргузор гардид. Дар он намояндагони Ҷамъияти агентиҳои туристии Япония, ширкатҳои сайёҳӣ, мутахассисони соҳа ва роҳбаладони ширкатҳои сайёҳӣ иштирок доштанд.
Зимни суханронӣ Сафири Фавқулода ва Мухтори Ҷумҳурии Тоҷикистон дар Япония Ҳамрохон Зарифӣ ба таври муфассал дар бораи рушди босуръати соҳаи туризм дар кишвар маълумот дода, таъкид намуд, ки дар Тоҷикистон шароити хуб барои қабули меҳмонони хориҷӣ дар солҳои охир ба вуҷуд оварда шудааст.
Сафири Тоҷикистон таъкид намуд, ки иқтидори сайёҳии Тоҷикистон бузург ва беназир аст, зеро кишвари таърихан яке аз марказҳои тамаддуни Шоҳроҳи Бузурги Абрешим буда, мероси бузурги фарҳангӣ ва таърихӣ, асолати таърихиву фарҳангӣ, гуногунии манзараҳои табиӣ ва олами набототу ҳайвонотро доро мебошад.
Махсусан дар барои меҳмоннавозӣ ва меҳмондӯстии самимии тоҷикон, субот ва амният дар тамоми қаламрави Тоҷикистон сухан гуфта шуд.
Дар рӯнамо оид ба ташаббуси ҳукумати Тоҷикистон дар бораи ҷорӣ шудани низоми раводиди электронӣ низ таъкид карда шуд.
Наворҳои кӯтоҳи таблиғотии имкониятҳои сайёҳии Тоҷикистон -табиати зебо, хусусиятҳои нотакрори табиӣ, намунаҳои нодири мероси таърихӣ ва ҷойҳои тамошобоби замонавии кишвар барои иштирокчиёни семинар намоиш дода шуданд.
Намояндагони ширкатҳои сайёҳии Япония диди худро барои рушди минбаъдаи ҳамкорӣ байни ду кишвар дар соҳаи туризм изҳор намуданд.