Кӯлоб: «Таблиғот тавассути созандагӣ ва бунёдкорӣ» -ҳамоиш

ДУШАНБЕ, 15.03.2017. /АМИТ «Ховар»/. 13 март дар ҷамоати деҳоти Даҳанаи шаҳри Кӯлоб  бо аъзои Ситоди доимоамалкунандаи таблиғотии Ҳизби Халқии Демократии Тоҷикистон  дар ҳудуди ҷамоати деҳоти Даҳана ва гурӯҳҳои мобилӣ вохӯрӣ доир шуд.

Дар вохӯрӣ раиси Кумитаи иҷроияи ҲХДТ дар шаҳри Кӯлоб Саъбагул Валиева, раиси ТҶҶ «Созандагони Ватан» дар вилояти Хатлон Орзу Ҳамидов ва раиси Ситоди таблиғотӣ дар ҳудуди ҷамоат Раҷабалӣ Абдураҳмонов сухан гуфтанд.

Баъд аз вохӯрӣ роҳбарияти Кумитаи иҷроияи ҲХДТ дар шаҳри Кӯлоб бо аъзои Ситоди таблиғотӣ ва гурӯҳҳои мобилӣ дар ҳамоиши ҳизбӣ таҳти шиори «Таблиғот тавассути созандагӣ ва бунёдкорӣ» дар деҳаи Мирапоқ иштирок намуданд.

Дар ин маъракаи дастаҷамъона зиёда аз 100 нафар иштирок намуда, 1200 бех ниҳолҳои мевадиҳандаро дар масоҳати 3 га шинониданд.

Инчунин дар рафти корҳои ободонӣ аз тарафи роҳбарияти Кумитаи иҷроияи ҲХДТ дар шаҳри Кӯлоб вобаста ба нуктаҳои асосии Паёми Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва иҷрои дастуру супоришҳое, ки аз Паёми Пешвои миллат бармеоянд, мавриди суҳбату фаҳмондадиҳӣ қарор дода шуд.