Муҳокимаи «Фаъолияти афзалиятнок оид ба захираҳои об ва офатҳои табиӣ дар даҳсолаи оянда» дар шаҳри Ню-Йорк

ДУШАНБЕ, 23.03.2017 /АМИТ «Ховар»/. Дирӯз Сироҷидин Аслов Вазири корҳои хориҷии Ҷумҳурии Тоҷикистон дар чорабинии махсус  таҳти унвони «Фаъолияти афзалиятнок оид ба захираҳои об ва офатҳои табиӣ дар даҳсолаи оянда», ки дар қароргоҳи Созмони Милали Мутаҳид  дар шаҳри Ню-Йорк баргузор гардида буд, иштирок ва суханронӣ намуд.   Дар ин бора аз ВКХ ҶТ хабар доданд.

Бино ба иттилои манбаъ, дар суханронии худ Вазири корҳои хориҷӣ ба афзоиши назарраси офатҳои табиӣ дар Тоҷикистон, ки боиси зарар дидани аҳолӣ ва иқтисодиёти кишвар мегарданд, таъкид намуд. Инчунин аз афзоиши таъсири тағйирёбии иқлим ба вазъи экологӣ дар кишвар, аз ҷумла обшавии миқдори зиёди барфу пиряхҳо ёдовар гардид.

Ҳамчунин С. Аслов изҳори умедворӣ намуд, ки Даҳсолаи байналмилалии амалиёти «Об барои рушди устувор, 2018-2028» ба таҳкими иқтидор ва табодули таҷрибаву дониш, баланд бардоштани ҳамкорӣ ва шарикӣ дар соҳаи офатҳои табиии  вобаста ба об кӯмак хоҳад кард, зикр намуд манбаъ.