Муовини Раиси шаҳри Душанбе бо сармоягузорони араб мулоқот анҷом дод

ДУШАНБЕ, 18.03.2017 /АМИТ «Ховар»/. Имрӯз дар Мақомоти иҷроияи маҳаллии ҳокимияти давлатии шаҳри Душанбе вохӯрии Бахтиёр Назирмадзода, муовини Раиси шаҳри Душанбе бо Абуллоҳ Муҳаммад Ал Бассомӣ, намояндаи Палатаи савдои Шоҳигарии Арабистони Саудӣ дар Ҷидда, Раиси ширкати тиҷоратии «Al-bassami Group of Сompanies»-и Шоҳигарии Арабистони Саудӣ мулоқот намуд.
«Бино бар сабаби он, ки нақшаи генералии шаҳри Душанбе дар баррасӣ ва омӯзиш қарор дорад, мо ба шумо дар ояндаи наздик дар самтҳои сохтмон, саёҳат ва истироҷи маъдан, ки шумо мехоҳед бо мо ҳамкорӣ ва ё сармоягузорӣ намоед, маълумоти зарурӣ пешниҳод хоҳем кард»,-зикр кард Бахтиёр Назирмадзода, муовини Раиси шаҳри Душанбе ва илова намуд, ки: «дар мавриди он, ки шумо мехоҳед сайёҳони Арабистони Саудӣ ба кишвари мо бештар ташриф оранд ва ё баръакс аз кишвари мо ба Арабистони Саудӣ раванд, мо ҳам омодаем дар ин самт пешниҳодҳои шуморо дар доираи қонунгузории амалкунанаи Ҷумҳурии Тоҷикистон баррасӣ ва ҳамкорӣ намоем».
Абдуллоҳ Муҳаммад Ал-Бассомӣ зикр кард, ки «ширкати мо яке аз бузургтарин ширкатҳои сайёҳӣ дар Шоҳигарии Арабистони Саудӣ мебошад. Аз ин лиҳоз мо мехоҳем дар шаҳри Душанбе меҳмонхонае бунёд кунем, ки сайёҳони араб ҳангоми ба Тоҷикистон омадан дар он иқомат кунанд».
Бахтиёр Назирмадзода дар ин маврид чунин гуфт: «Алҳол мо як лоиҳаи мукаммал дар мавриди таҷдиди меҳмонхонаи «Пойтахт»-ро дар даст дорем, ки метавонем онро ба шумо пешниҳод намоем. Дар умум мо мехоҳем бо шумо ҳамкорӣ намоем ва барои оғоз намудани фаъолиятатон дар шаҳри Душанбе дар доираи қонунгузориҳои амалкунанда месодиат намоем».
«Сипосгузории худро ба Заробиддин Қосимӣ, Сафири Фавқулода ва Мухтори Ҷумҳурии Тоҷикистон дар Шоҳигарии Арабистони Саудӣ мерасонам, ки барои ташрифи мо ба Тоҷикистон ва мулоқот намуан бо роҳбарони вазорату идораҳо мусоидат намуд»,- гуфт Абдуллоҳ Муҳаммад Ал-Бассомӣ.