Сафири Тоҷикистон Файзулло Холбобоев ба Президенти Ҷумҳурии Молдова эътимоднома супорид

ДУШАНБЕ, 25.03.2017 /АМИТ «Ховар»/. Дар бинои Қасри Президенти Ҷумҳурии Молдова 23 март маросими супоридани эътимодномаи Cафири Фавқулода ва Мухтори Ҷумҳурии Тоҷикистон дар Ҷумҳурии Молдова Файзулло Холбобоев бо иқоматгоҳ дар шаҳри Киев ба Президенти Ҷумҳурии Молдова ҷаноби Игор Додон барпо гардид. Дар ин бора ба АМИТ «Ховар» аз Вазорати корҳои хориҷии Тоҷикистон хабар доданд.

Тибқи расмиёти кишвар ва муқаррароти ташрифотӣ, ба ифтихори Сафири Ҷумҳурии Тоҷикистон горди фахрӣ саф ороста, сурудҳои миллии ду кишвар садо доданд.

Сипас Сафири Ҷумҳурии Тоҷикистон ба бинои Қасри Президенти Ҷумҳурии Молдова ворид гардида, дар толори расмӣ эътимодномаи худро ба Президенти Ҷумҳурии Молдова Игор Додон супорид.

Пас аз ба анҷом расидани маросими супоридани эътимоднома мулоқоти дуҷонибаи Президенти Ҷумҳурии Молдова боСафири Ҷумҳурии Тоҷикистон доир гардид, ки зимни он роҳҳои боз ҳам пурзуртар намудани ҳамкориҳои дуҷониба байни Ҷумҳурии Тоҷикистон ва Ҷумҳурии Молдова мавриди баррасӣ қарор гирифтанд.

Президенти Ҷумҳурии Молдова Файзулло Холбобоевро ба муносибати оғози расмии рисолати дипломатиаш дар Ҷумҳурии Молдова табрик намуда, ба ӯ баҳри иҷрои фаъолияти пурсамар ҷиҳати густариши муносибатҳои дуҷонибаи Тоҷикистону Молдова комёбиҳо орзу намуд.

Дар навбати худ Файзулло Холбобоев салому паёмҳои гарми Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба Президенти Ҷумҳурии Молдова расонид ва омодагии Тоҷикистонро ҷиҳати таҳким ва густариши равобити созандаи ду кишвар, бо самту равандҳои ҷадид ғанитар сохтани онҳо ва густариш додани равобити Тоҷикистону Молдова дар чаҳорчӯби созмонҳои байналмилалӣ ва минтақавӣ иброз намуд.

Президенти Ҷумҳурии Молдова изҳори миннатдории худро баён сохта, манфиатдории  Молдоваро ба таҳким ва густариши муносибатҳои дуҷониба бо Ҷумҳурии Тоҷикистон таъкид намуд, инчунин, дар ҷараёни мулоқот муҳокимаи як қатор масъалаҳои дуҷонибаи Тоҷикистону Молдова, аз ҷумла, андешидани чораҳо оид ба барқарор намудани Комиссияи байниҳукуматии Тоҷикистону Молдова оид ба ҳамкориҳои тиҷоративу иқтисодӣ ва илмиву техникӣ вусъат додани заминаи ҳуқуқӣ, тавсеа бахшидан ба муносибатҳои иқтисодӣ ва савдо ва мусоидат ба табодули фарҳангӣ сурат гирифт.

Файзулло Холбобоев изҳор намуд, ки тамоми саъю кӯшиши худро баҳри рушд ва таҳкими минбаъдаи ҳамкориҳо дар асоси принсипҳои дӯстона ва муносибатҳои шариконаи мутақобилан судманд миёни Тоҷикистон ва Молдова равона хоҳад кард.

Президенти Ҷумҳурии Молдова қайд намуд, ки соли 2018 барои Тоҷикистону Молдова соли ҷашнист, ба истиқрори муносибатҳои дипломатии Ҷумҳурии Тоҷикистон ва Ҷумҳурии Молдова 25 сол пур мешавад, бинобар ин Президенти Ҷумҳурии Молдова, Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро бо сафари расмӣ ба Ҷумҳурии Молдова даъват намуд.

Дар охир, Президенти Ҷумҳурии Молдова ба Сафири Тоҷикистон дар рисолати муҳимаш баҳри рушди минбаъдаи ҳамкориҳои Тоҷикистон ва Молдова муваффақияту комёбиҳо таманно намуд.