Боздиди вакили Бундестаги Олмон аз Парлумони Тоҷикистон

ДУШАНБЕ,10.04.2017/АМИТ «Ховар»/. Тоҷикистон хостори рушди ҳамкории гуногунҷабҳаи иқтисодӣ бо Олмон аст». Ин матлабро Шукурҷон Зуҳуров, Раиси Маҷлиси намояндагони Маҷлиси Олии Ҷумҳурии Тоҷикистон дар мулоқоташ бо Манфред Грунд, роҳбари ҳайати Бундестаги Олмон, ки бо сафари корӣ ба Тоҷикистон ташриф овардааст, зикр намуд.
Дар мулоқот вазъ ва дурнамои муносиботи дуҷониба ва бисёрҷонибаи Тоҷикистону Олмон, хусусан робитаҳои парлумонӣ баррасӣ гардиданд. Шукурҷон Зуҳуров зикр кард, ки густариши муносибатҳо бо Олмон яке аз самтҳои муҳими сиёсати хориҷии Ҷумҳурии Тоҷикистон аст. Дар ин росто Олмон ҳамчун шарики асосӣ ва боэътимоди Тоҷикистон дар Аврупо маҳсуб меёбад.
Дар мулоқот мусоҳибон масоили марбут ба таҳкимии ҳамкории иқтисодию тиҷоратӣ, илму маориф, фарҳанг, амният, бахусус мубориза бо таҳдид ва хатарҳои муосирро баррасӣ намуданд. Шукурҷон Зуҳуров ҳамчунин афзуд, ки Ҷумҳурии Тоҷикистон ба истифодаи имконоти сармоягузорӣ, молиявӣ ва тиҷоратии Олмон, инчунин таҷрибаи бойи ширкатҳои он, дар рушди иқтисодӣ, бахусус дар соҳаи гидроэнергетика, нақлиёт, туризм ва технологияи нави коркарди маҳсулоти кишоварзӣ ҳавасманд аст.
Зикр шуд, ки Тоҷикистон дар самти дастрасӣ ба истиқлолияти энергетикии кишвар ба дастовардҳои назаррас ноил гардида, тасмим дорад дар оянда ба кишварҳои Осиёи Марказӣ, Афғонистон ва Покистон барқи аз лиҳози экологӣ тоза ва арзон пешкаш намояд.
Бо дахли тақвияти ҳамкорӣ дар мубориза бар зидди зуҳуроти номатлуби замони муосир, терроризм ва экстремизм Шукурҷон Зуҳуров таъкид кард, ки таъмини амният айни замон боиси нигаронии тамоми ҷомеаи ҷаҳонӣ гардидааст. Аз ин рӯ, Тоҷикистон ва Олмон дар эътилофи зиддитеррористӣ паҳлӯи ҳам истода, барои барқарорсозӣ, таҳкими сулҳу субот ва эҳёи иқтисодиёт дар Афғонистони ҳамсоя саҳми арзанда мегузоранд. Тоҷикистон дар хатти аввали мубориза бо гурӯҳҳои террористию экстремистии динӣ ва маводи мухаддир ба Аврупо қарор дошта, дар ин самт бо тамоми неруву тавон сипари боэътимод маҳсуб меёбад.
Дар мулоқот ҷонибҳо изҳори боварӣ намуданд, ки тавассути муколамаҳои доимии сатҳи баланд робитаҳои дуҷонибаи Тоҷикистону Олмон дар ҳама самтҳо мазмуну мундариҷаи нав касб хоҳанд кард.