Боздошти сокинони ноҳияи Шаҳринав бо гумони дуздии қариб 200 метр хатҳои телефонӣ

ДУШАНБЕ, 24.04.2017. /АМИТ «Ховар»/. Вазорати корҳои дохилии Ҷумҳурии Тоҷикистон аз ошкор гардидани як ҷинояти дуздӣ, ки зимни он аз ҷониби ду нафар сокинони ноҳияи Шаҳринав 198 метр ноқилҳои хатҳои телефон дуздида шуда буд, хабар додааст.
Тавре аз Вазорати корҳои дохилӣ хабар доданд, ба мақомоти милитсия хабар расид, ки шаби 25 ба 26 декабри соли 2016, тахминан соати 01:30 шахсони номаълум бо тариқи пинҳонӣ аз ҳудуди ҷамоатҳои деҳоти Шаҳринав ва Сабои ноҳияи Шаҳринав дар маҷмӯъ 198 метр ноқилҳои хатҳои телефониро дуздида, аз ҷойи ҳодиса ғайб задаанд. Зарари расонидашуда ба Ҷамъияти саҳҳомии кушодаи «Тоҷиктелеком»-и ноҳияи Шаҳринав 5 ҳазору 148 сомониро ташкил додааст.
«Зимни гузаронидани чорабиниҳои фаврӣ-ҷустуҷӯӣ бо гумони содир намудани ҷинояти мазкур ду нафар марди 48 ва 52-солаи сокинони ноҳияи Шаҳринав, ки ҳар ду ҳам қаблан суд шудаанд, дастгир карда шуда, далелҳои шайъӣ аз онҳо гирифта шуданд»,-иттилоъ доданд аз Вазорат.