Дар Қӯрғонтеппа оид ба таъмини амнияти иттилоотӣ машварат доир шуд
![](https://khovar.tj/wp-content/uploads/2017/04/amniyati-ittilooti.jpg)
ҚӮРҒОНТЕППА, 20.04.2017 /АМИТ «Ховар»/. Имрӯз дар шаҳри Қӯрғонтеппа дар мавзӯи «Иттилоот ва нақши он дар таъмини сулҳу суботу амнияти кишвар» машварат баргузор гардид. Дар ин бора аз Мақомоти иҷроияи ҳокимияти давлатии вилоят хабар доданд.
Дар кори машварат муовини раиси вилояти Хатлон Махфират Хидирзода ва раиси шаҳри Қӯрғонтеппа Амирулло Асадулло сухан гуфтанд. Дар машварат муовинони раисони шаҳру навоҳӣ, мудирони маориф, имомхатибони масҷидҳои чомеи шаҳру навоҳӣ ва дигар шахсони масъул ширкат варзиданд.
Тавре масъулини машварат иттилоъ доданд, мақсад аз баргузории он таъмини амнияти иттилоотӣ мебошад.
Муовини раиси вилояти Хатлон Махфират Хидирзода итттилоотро воситаи муҳими таъмини сафарбар кардани ҷомеа барои расидан ба ҳадафҳои дарпешистода номида, зарурати саҳеҳ ва дақиқ будани ҳар як иттилоъро таъкид кард.
«Мо бояд нагузорем, ки ба воситаи паҳн кардани иттилои нодуруст касе ҳаёти осоиштаи чомеаи моро халалдор созад»,-иброз дошт М.Хидирзода.