Гузариш аз ҳадафгирии монетарӣ ба ҳадафгирии таваррум

ДУШАНБЕ, 17.04.2017 /АМИТ «Ховар»/. Ҳайати Хазинаи байналмилалии асъор маърӯзаи худро оид ба «Гузариш аз ҳадафгирии монетарӣ ба ҳадафгирии таваррум» дар Бонки миллии Тоҷикистон муаррифӣ намуд. Дар ин бора аз Бонки миллӣ хабар доданд.
Маърӯза аз ҷониби Абдул Носир, роҳбари ҳайати намояндагии Хазинаи байналмилалии асъор дар ҳузури роҳбарияти Бонки миллии Тоҷикистон ва роҳбарону мутахассисони воҳидҳои сохтории Бонки миллии Тоҷикистон манзур гардид. Муаррифии мазкур асосан ба масъалаи тақвият бахшидани раванди таҳия ва татбиқи сиёсати босамари монетарӣ ҷиҳати гузариш ба реҷаи нави монетарии ҳадафгирии таваррум бахшида шуда буд.
Зимни муаррифӣ масъалаи пешбурди сиёсати монетарӣ ва саҳми бонкҳои марказӣ дар рушди он, татбиқи он дар робита бо мақомоти дахлдори давлатӣ, таъсири омилҳои беруна ба сиёсати монетарӣ ва пешгирӣ намудани ҳолатҳои ғайричашмдошт, татбиқи босамари сиёсати монетарӣ ҳангоми гузаронидани ислоҳотҳо, нақши муҳими коммуникатсия дар таҳким бахшидани сиёсати монетарӣ баррасӣ гардиданд.
Дар қисмати муҳокима роҳбарони воҳидҳои сохтории Бонки миллии Тоҷикистон ба масъалаҳои асосии сиёсати пулию қарзӣ ва асъорӣ, таҳкимёбии фишангҳо, аз ҷумла истифодаи фишангҳои фоизии сиёсати монетарӣ ва фаъолияти бозори байнибонкӣ таваҷҷуҳ зоҳир намуданд.
Боиси тазаккур аст, ки намояндагони Хазинаи байналмилалии асъор аз 4 то 19 апрели соли равон дар доираи кумаки техникӣ дар Бонки миллии Тоҷикистон қарор дошта, дар самти пешбурди сиёсати монетарӣ дар якҷоягӣ бо мутахассисони дахлдори Бонки миллӣ ҳамкориро идома медиҳанд.