Конститутсия-истиқлолият ва тамомияти арзии Тоҷикистон аст

ДУШАНБЕ, 04.04. 2017/АМИТ «Ховар»/. «Конститутсияи Ҷумҳурии Тоҷикистон хусусияти миллӣ дорад, зеро бо иродаи мардуми сарбаланди кишвар қабул гардида, дар он суннатҳои таърихии давлатдорӣ ва андешаҳои инсондӯстонаи тоҷикон инъикос гардидааст»,- гуфт Бахтовар Сафаров, вакили Маҷлиси намояндагон дар семинар, ки имрӯз дар дар мавзӯи «Конститутсияи Ҷумҳурии Тоҷикистон: Салоҳият ва вазифаҳои Маҷлиси Олии Ҷумҳурии Тоҷикистон» дар Парлумон доир гардид.
Таъкид шуд, ки дар Конститутсия таъмини соҳибихтиёрӣ, истиқлолият ва тамомияти арзии Тоҷикистон вазифаи асосии давлат эълон шудааст. Дар айни замон бо мақсади ҳимояи арзишҳои конститутсионӣ ва ташаккули пояҳои давлатдории миллии тоҷикон тағйирнопазирии шакли идораи кишвар, тамомияти арзӣ, моҳияти демократӣ, ҳуқуқбунёдӣ, дунявӣ ва иҷтимоии давлат аз ҳадафҳои бунёдии Конститутсия эътироф гардидааст.
Бо зикри муҳимияти ин санади сарнавиштсоз гуфта шуд, ки аҳаммияти таърихии Конститутсия дар таъмини сулҳу субот ва ваҳдати миллӣ дар кишвар беназир буда, он омили асосии кафолати устувории ҳаёти сиёсии ҷомеаи Тоҷикистон гардид. Бо назардошти он ки пешрафти тамоми соҳаҳои ҳаёти давлат ва ҷомеа натиҷаи сулҳу оромӣ ва ваҳдату ягонагист, дар Конститутсия дарҷ гардид, ки Тоҷикистон ҳамеша сиёсати сулҳҷӯёнаро дар амал татбиқ менамояд.
Вакили Маҷлиси намояндагон ҳамчунин афзуд, ки мо дар сатҳи Конститутсия ба ҷомеаи ҷаҳон эълон доштем, ки халқи Тоҷикистон озодӣ ва ҳуқуқи шахсро арзиши олӣ шуморида, баробарҳуқуқӣ ва дӯстии тамоми миллату халқиятҳоро эътироф мекунад ва ҷонибдори бунёди ҷомеаи адолатпарвар аст.