Таъмини ҷавонон бо кор: 12 нафар дар Хадамоти фурӯши барқи ноҳияи Ёвон бо кори доимӣ таъмин шуданд

ЁВОН, 12.04.2017. /АМИТ «Ховар»/. Дар доираи чорабиниҳо бахшида ба Соли ҷавонон дар бинои  Хадамоти фурӯши барқи ҶСК шабакаҳои барқи ноҳияи Ёвон озмуни  ҷойҳои корӣ доир гардид. Дар натиҷа  аз 40 нафар иштироккунанда 12 нафар ҷавонони соҳибмаълумоту ботаҷриба ба кори доимӣ қабул гирдиданд. Дар ин бора сарнозири хадамоти фурӯши барқи ноҳия Баҳодур Исматов ба хабарнигори АМИТ «Ховар» иттилоъ дод.
Муовини сардори шабакаҳои барқи ноҳия оид ба фурӯши барқ Азиз Воҳидов иброз намуд, ки «ҷавонон аз дастгириҳои пайвастаи Пешвои миллат Эмомалӣ Раҳмон бархӯрдоранд. Бесабаб нест, ки сол ба сол ҷавонон ба мансабҳои роҳбарикунанда бештар ҷалб мегарданд. Ҳоло дар хадамоти фурӯши барқи ноҳия ҳаштод дар сади мутахассисон аз ҳисоби ҷавононанд. Аз ин рӯ, онҳоро мебояд дар таҳкими сулҳу Ваҳдати миллӣ, пос доштани арзишҳои миллӣ, ҳифзи таъриху фарҳанг ва ҷавобан ба ғамхориҳои Пешвои миллат содиқона кор карда, ба боварии давлату ҳукумат ва миллати худ арзанда бошанд».