Танҳо ҷавонони бомаърифат метавонанд пешрафти ҷомеаро таъмин намоянд!

ДУШАНБЕ, 28.04.2017 /АМИТ «Ховар»/. Пешгирии амалҳои номатлуб дар байни ҷавонон, тарғиби илму донишомӯзӣ ва риояи одобу рафтори ҳамида миёни онҳо аз масъалаҳое буданд, ки зимни вохӯрии кормандони милитсия бо омӯзгорону донишҷӯёни Донишгоҳи давлатии тиббии Тоҷикистон ба номи Абӯалӣ ибни Сино мавриди баррасӣ қарор гирифтанд.
Дар ин ҷамъомади бошукӯҳ, ки дирӯз дар бинои донишгоҳи мазкур баргузор гардид, дар робита ба муноқишаҳои байнимактабӣ, ҷиноятҳои гурӯҳии ҷавонон, ба роҳҳои хато рафтани бархе аз намояндагони ин насли ояндасоз ва бемасъулиятии баъзе волидон нисбат ба тақдири ояндаи фарзандон изҳори нигаронӣ карда шуд.
Сардори Раёсати нозиротӣ-ташкилии Вазорати корҳои дохилии Ҷумҳурии Тоҷикистон, полковники милитсия Абдураҳим Раҳимзода иброз намуд, ки ҷавонон, аз ҷумла донишҷӯён, неруи тавонои давлат буда, бо дониши хубу аъло ва ахлоқи намунавӣ бояд ибрати дигарон бошанд ва дар роҳи бунёдкориву созандагӣ ва тарғиби тарзи ҳаёти солим аз дигар табақаҳои ҷомеа тафовут дошта бошанд. «Ҷой доштани амалу кирдорҳои ҷиноӣ миёни баъзе ҷавонон ва ба роҳҳои ғайриқонунӣ рафтани бархе донишҷӯён ба ин номи пуршараф иснод оварда, симои донишҷӯро, ки дар назари аҳли ҷомеа чун фарди донишманду маърифатнок ва масъулиятшиносу боодоб мебошад, доғдор месозад. Имрӯз бисёр дардовар аст, вақте ки мо аз даст доштани баъзе донишҷӯён дар содир намудани ҷиноятҳои вазнине, амсоли одамкушӣ, нашъаҷаллобӣ, дуздиву қаллобӣ ва авбошиву ғоратгарӣ ҳарф мезанем», — гуфт А. Раҳимзода.
Мавзӯи дигаре, ки дар вохӯрии кормандони милитсия бо донишҷӯёни ДДТТ ба он диққати асосӣ дода шуд, шомилшавии баъзе ҷавонон ба сафи ҳизбу ҳаракатҳои ифротгаро буд.
Роҳбарияти Донишгоҳи давлатии тиббии Тоҷикистон ин иқдоми масъулини мақомоти корҳои дохилиро, ки ба беҳтар гардидани сатҳи ҳамкории соҳаи маориф бо мақомоти милитсия мусоидат менамояд, дастгирӣ намуданд.